Wednesday 8 October 2014

“ ဂီတရူး နဲ့ ဂီတမိတ် . . . ”




ဦးဟန်ကြည်ဆိုတဲ့ လူကြမ်းကြီးက သီချင်းနဲ့ ပတ်သက်လာရင် Black-eyed Susan ကိုတောင် ကလေးဘတုန်းက အမြီးအမောက်တည့် ကီးကိုက်အောင်မဆိုနိုင်၊ တူရိယာနဲ့ ပတ်သက်လာရင် ၀ါးလက်ခုပ်ကိုတောင် နရီမှန်အောင် မတီးတတ်၊ အကနဲ့ ပတ်သက်လာရင် ချိုမိုင်မိုင်တောင် အပေါက်အလမ်းမတည့်ပေမင့် ဂီတသုခုမကိုတော့ ဘာမက်သလဲ မမေးနဲ့။ ဘာမြတ်နိုးသလဲ မမေးနဲ့။

မေမေ့ပြောစကားအရ မောင်ဟန်ကြည် ငတိက ပုလုကွေးအရွယ်ကတည်းက ညအိပ်ရာဝင်ရင် သီချင်းကလေးနဲ့ ချော့သိပ်မှ အိပ်ပျော်တာ ဆိုပဲ။ အံမယ် သီချင်းစာသားကို နားလည်ဖို့ထားဦး စကားတောင် မပြောတတ်သေးတဲ့ ငတိက မြူးမြူးကြွကြွ သီချင်းမျိုးဆိုပြရင် သဘောမကျတဲ့အပြင်၊ သီချင်းတစ်ပုဒ်ကို သုံးလေးညဆက်တိုက် ဆိုပြရင်လည်း နားယဉ်ပြီးသား သီချင်းကြီးကို နားမထောင်ချင်ဘူး ဆိုတဲ့ သင်္ကေတနဲ့ ပြဲပြဲလန်အောင် ငိုပါသတဲ့။ အင်း...ဦးဟန်ကြည့်အဘွားရော၊ မေမေပါ ဂီတပိုးကလေးပါခဲ့လို့ သီချင်းကလေး အမြဲညည်းနေတတ်တဲ့ ၀သီကလေး ရှိပေလို့သာပေါ့။ ခေတ်ကလည်း ငြိမ့်ငြိမ့်ညောင်းညောင်း သီချင်းတွေ ခေတ်စားခဲ့တာမို့လည်း အဆင်ပြေတယ်ထင်ပါရဲ့။ သည်ဘက်ခေတ်လို ခွေးခေါ်သံ၊ ၀က်ခေါ်သံ “ ရို့ ရို့...အို့ အို့ ” တွေနဲ့ချည်း တန်ဆာဆင်ထားတဲ့ သီချင်းတွေနဲ့ချည်း တင်းကြမ်းဖြစ်နေရင် သကောင့်သားမောင်ဟန်ကြည် ပုခက်ထဲကငချွတ်ခမျာ အိပ်လို့တောင် ပျော်ရှာမယ် မထင်ပေဘူး ;)

မောင်ဟန်ကြည် မတ်တပ်ပြေးအရွယ်ရောက်တော့ ဂီတဗီဇက ပိုလို့တောင် ပီသလာသေးတယ်ဆိုကိုး။ ထူးအိမ်သင်ရဲ့ သီချင်းစာသားကို ကိုယ်ကြားသလို ပြန်ဆိုထားတဲ့ “ နှမ်းခင်းလမ်းလေးလျှောက်ပါ...ချစ်ကလေးရယ်... ” ဆိုတဲ့ တစ်ပိုဒ်ကို ပါးစပ်ထဲက မချတမ်း ဆိုပါသတဲ့။ အနှီတစ်ကြောင်းတည်းကိုချည်း အားတိုင်းအော်နေတာကို နားကြားပြင်း ကတ်လာတဲ့ ဖေဖေက “ ငါ့သားရဲ့...ပန်းခင်းလမ်းပါကွ... ” လို့ ဘယ်လောက်ပဲ ပြင်ပြင် မောင်ဟန်ကြည်ကတော့ စိတ်ကလေးကြည်တဲ့အခါတိုင်း “ နှမ်းခင်းလမ်း ” တုန်း။ တောက်မယ့် မီးသွေးခဲများဆိုတော့လည်း ဂီတကို အနှီလောက် နားနီးဟန်တူပါရဲ့ဗျာ... ;)

နှစ်တန်း သုံးတန်း အရွယ်ရောက်လာတဲ့အခါ ကျောင်းပိတ်ရက်တွေမှာ မောင်ဟန်ကြည်  ပျောက်ချက်သား ကောင်းနေပြီဆိုရင် သေချာပြီ။ ကောက်ရိုးပုံပေါ်တက် ပက်လက်လှန်ပြီး တွေ့ကရာသီချင်းတွေ ညည်းနေပြီသာမှတ်။ ခေတ်ကလည်း အစစအရာရာ တိုရေရှားရေ နိုင်တဲ့ခေတ်ဆိုတော့ စတီရီယို ကက်ဆက်ဆိုတာ တကယ့်သူဌေးသုံးပစ္စည်း။ အိမ်မှာရှိတဲ့ အဘိုးရဲ့အမွေ National ရေဒီယိုကြီးကလည်း ကိုယ်ကြိုက်တာကို ဖွင့်နားထောင်လို့မရဘဲ သူလွှင့်တာချည်း နားထောင်နေရတဲ့အပြင် အားအားရှိရင် “ ကလေးတို့ရေ...လာကြ လာကြ...ကြားလိုက်အောင် နားစိုက်ထောင်ကြ... ” ဆိုတဲ့ ကလေးတို့ဆရာမသီချင်းတို့... ” AIDS အေ့ဒ်စ်ရောဂါ ကြောက်စရာ... ” တို့ချည်း ပတ်လည်ရိုက်အောင် လွှင့်နေတော့ သီချင်းကြိုက် မောင်ဟန်ကြည် ဘယ်အာသီသ ပြေလိမ့်တုန်း။ အနှီတော့လည်း ကောက်ရိုးပုံပေါ်တက်ပြီး ကိုယ်စိတ်ကူးပေါက်တဲ့သီချင်းကို ဆိုချင်သလို အော်ဆိုရတာကို ခံတွင်း ပိုလိုက်ပေသပေါ့။ တွေးမိသမျှကို ပေါက်ကရသံစဉ်ထည့်ပြီး ဆိုချင်သလို အော်ဆိုခဲ့တဲ့ သီချင်းတွေကို အသံသာသွင်းထားခဲ့လိုက်ရင် သည်ဘက်ခေတ် ဂျောက်ဂျက်တို့ မှောက်လျက်တို၊့ ဆင်ပေါက်တို့ ခွေးပေါက်တို့၊ ကြက်ဖတို့ ကြွက်မတို့အကုန် ထိုင်ငိုသွားရမယ့် Modern Antique သီချင်းတွေ ဖြစ်လိမ့်မယ် ထင်ပါရဲ့... ;)

ဂီတကို အနှီလောက် အရူးအမူး ဖြစ်ခဲ့ပါလျက်နဲ့ သည်အသက်သည်အရွယ် ရောက်တဲ့အခါ ဂီတဘက်မှာ ဘာတစ်ခုမှ လောက်လောက်လားလား မဖြစ်ခဲ့တာကို ပြန်တွေးမိရင် ခေတ်ကြီးကိုပဲ အပြစ်တင်ရမလား မပြောတတ်ပေါင်ဗျာ... ( သူများတွေလည်း ကိုယ်မစွမ်းလို့ မစွံခဲ့တဲ့ကိစ္စတစ်ခုခုကို လူရှေ့ချပြချင်ရင် လက်ညှိုးအရင်ပြင်ထားတာကို သတိထားမိလို့ ခေတ်မီအောင် ပင်လယ်ငါး စားလိုက်ပါသဗျား ;)  ) အနှီဘက် ၈၀ ကျော်နှစ်တွေဆိုတာ တကယ့်ခေတ်ကြီးကိုး။ သီချင်းကလေးတစ်ပုဒ်လောက် နားထောင်ဖို့ဆိုတာ လွယ်မှတ်လို့။ ကိုယ့်အိမ်မှာ ကက်ဆက်ရှိရင်သာ အခွေကလေး ထိုးထည့်၊ ခလုတ်ကလေး ဂျောက်ခနဲနှိပ်လိုက်ရုံနဲ့ သီချင်းသံထွက်လာတာကိုး။ အစစအရာရာ ဆယ်လီကျေပြီး ငွေပိုအကုန်မခံတဲ့ ဦးဟန်ကြည့်မိဘတွေဆိုတာ ကက်ဆက်ကို ဇိမ်ခံပစ္စည်း စာရင်းထဲ ထည့်ထားကြတာမို့ သီချင်းကြိုက်တဲ့ဦးဟန်ကြည်ခမျာ လက်ဖက်ရည်ဆိုင်ရှေ့ ဖြတ်လျှောက်သွားရင်း နားစွန်နားဖျား ကြားခဲ့ရတဲ့ သီချင်းတစ်ပိုင်းတစ်စလောက်ပဲ ခေါင်းထဲမှာ ရှိပါလေရော။ အနှာတောင် သီချင်းဖွင့်နေတဲ့ လက်ဖက်ရည်ဆိုင်ရှေ့ရောက်ရင် သီချင်းကြာကြာ နားထောင်ခွင့်ရဖို့အတွက် slow motion နဲ့ လမ်းလျှောက်ပေလို့သာပေါ့။ စက်ဘီးနဲ့သာ ဖြတ်သွားမိရင် ဘာသီချင်းမှ ခေါင်းထဲ ၀င်မှာမဟုတ်တာ သေချာပေါက်။

မြို့ထဲမှာ ပွဲရှိ၊ အလှူ၊ မင်္ဂလာဆောင်များရှိရင် မောင်ဟန်ကြည်တို့ ပျော်ချက်ကတော့ ကမ်းကုန်။ မပျော်နေရိုးလား။ အညာထုံးစံအတိုင်း မန်ကျည်းပင်ခွကြားမှာ လောက်စပီကာတင်ပြီး မိုင်ကုန်တင်ဖွင့်တဲ့ သီချင်းဟူသမျှကို အလကားမတ်တင်း နားထောင်ရပေသကိုး။ သို့ပေမင့် ကိုယ်နားထောင်ချင်တဲ့ စတီရီယိုသီချင်းကတော့ ခပ်ရှားရှား။ ကိုသိန်းတန်နဲ့ချည်း ညားတာက ခပ်များများ။ နွေရာသီကျောင်းပိတ်လို့ အဘိုးအဘွားတွေရဲ့ ရွာမှာသွားနေပြီး ကြက်သွန်ကလေး ဘာလေး ၀ိုင်းဝန်းတူးပေးတဲ့အချိန်ဆိုရင်တော့ ကက်ဆက်ဇာတ်လမ်းတွေ နားထောင်ရပါလေရော။ တောဆိုတော့လည်း တောအလိုက် တောအကြိုက် ဘီအီးဒီအောင်သိုက်ပေါ့လေ။ မနက်ခင်းမှာ ကြက်သွန်တူးပြီးလို့ နေခင်းမှာ ကြက်သွန်ဖြတ်၊ ဥကြီး ဥလတ်ရွေးကြတဲ့အခါ ကြက်သွန်ခင်းရှင်က ကက်ဆက်ဖွင့်ပြီး ဧည့်ခံရတာ အညာထုံးစံကိုး။

တစ်နွေမှာတော့ အဘိုးအဘွားတွေနဲ့ ခြံချင်းကပ် တောင်သူကြီးသား လူပျိုသိုးနဲ့ သူ့ခြံနဲ့မျက်နှာချင်းဆိုင်က လူပျိုသိုး နှစ်ယောက်သား တစ်ယောက်ကိုတစ်ယောက် လူ့ငယ့်ဘာဝ ပြိုင်ကြဆိုင်ကြရင်း ကက်ဆက်တွေ အပြိုင်ဝယ်၊ sound box တွေ အပြိုင်ဆင်ပြီး နေ့ရှိသရွေ့ သူနိုင်ကိုယ်နိုင် အပြိုင်ကြဲလိုက်ကြတာ တစ်ရပ်လုံး စိတ်ညစ်ကြပေမင့် စတီရီယိုသီချင်းတွေကို ဖရီးနားထောင်ခွင့်ရတဲ့ မောင်ဟန်ကြည်ကတော့ ဖိုးကြိုင်းတုတ်ကို ဖြစ်လို့။ ကိုယ့်လူနှစ်ယောက်ကလည်း မနိုင့်နိုင်အောင် အပြိုင်ဖွင့်ကြတာများ ဈေးအင်မတန်ကြီးတဲ့ sound box တွေကို တစ်လုံးကနေ နှစ်လုံး မ၀ယ်နိုင်တော့တဲ့အခါ ရေအိုးထဲမှာ speaker ထည့်ပြီးတောင် ဖွင့်လိုက်ကြသေး ;) ။ တောသားတွေဆိုပေမင့်လည်း မြို့ကို အရောက်အပေါက်ရှိကြတာမို့ တစ်ခါတစ်ခါများ Madonna ရဲ့ Like a Virgin တွေဘာတွေတောင် ဖွင့်သေးတာရယ်။ ခြံချင်းကပ်နေတဲ့ အဘိုး အဘွားတွေကတော့ စိတ်ရှုပ်ကြပေမင့်လည်း ဂီတအိုးကွဲ မောင်ဟန်ကြည် ပုလုကွေးကတော့ သူရို့ဖွင့်သမျှကို ဒိုင်ခံနားထောင်ရင်း ၀မ်းတွေကို သာလို့။ တစ်ခါတစ်ခါများ သူရို့ခြံဘက်သွားပြီး ဟိုသီချင်းကလေးဖွင့်ပါ၊ သည်သီချင်းကလေးလုပ်ပါလို့ သီချင်းသွားတောင်းရင် မောင်မင်းကြီးသားများက ၀မ်းတွေများတောင် သာလို့။ မသာနေရိုးလား။ မြို့သားကြီးကိုယ်တိုင်က တကူးတက သီချင်းလာတောင်းတာကိုး။ မောင်ဟန်ကြည်က မြို့ပိစိကွေးသားဆိုပေမင့် အညာတောကြားမှာတော့ ရူပါထွားတဲ့ စူပါစတား အငယ်စားကိုး ;)

ခက်တာက မောင်ဟန်ကြည် ဆယ်တန်းကျောင်းသားရင့်မကြီး ဖြစ်တဲ့အထိ အိမ်မှာ ကက်ဆက်တစ်လုံးမှ မရှိတဲ့အဖြစ်။ အနှီခေတ်ကလည်း မိဘကို အလိုလိုက်ရတဲ့ခေတ်ဆိုတော့ ကက်ဆက်လိုချင်လိုက်တာလို့ ဘယ်ပူဆာရဲ့လိမ့်တုန်း။ ပညာရေးနဲ့ပတ်သက်လာရင် ဘယ်လောက်ကုန်ကုန် အကုန်ခံမယ်ကျန်တဲ့ အပရိက ကိစ္စတွေအတွက်တော့ တစ်ပြားမှ အကုန်မခံဘူး ဆိုတဲ့ မိဘရဲ့ ပေါ်လစီကြီးကို ဓာတ်ပြား အပ်ဖျားတိုအောင် နေ့တိုင်းဖွင့်ပြသမျှ နားထောင်နေရတော့လည်း ကိုယ့်လိုဘကလေးကို စိတ်ထဲမှာ အသာမြိုရင်း ကက်ဆက်ရှိတဲ့သူငယ်ချင်းအိမ်ကို အလည်ရောက်ရင် သူရို့ဖွင့်ပြတာလေးတွေ နားထောင်၊ လက်ဖက်ရည်ဆိုင်ရှေ့ဖြတ်သွားရင်းနဲ့ နားစွန်နားဖျားကြားရုံလောက်နဲ့တင် ဂီတကို မ၀ရေစာကလေး မှီဝဲခဲ့ရပါလေရော။ သို့ပေမင့် ရေဒီယိုသီချင်းကတော့ ဘာနားထောင်ရသလဲ မမေးနဲ့။ အစီအစဉ်စကတည်းက ဖွင့်ထားလိုက်တာ အင်္ဂလိပ်ပိုင်းအစီအစဉ်ပြီးမှ သင်းကို အနားပေးတာ ထုံးစံ။ သင်္ချာတွက်ရင် ရေဒီယိုက သီချင်းလာတဲ့အချိန်လေးနဲ့ ချိန်ကိုက်ပြီး ရေဒီယိုရှေ့မှာ ထိုင်တွက်ရတာ အရသာတစ်ခု။ စာကျက်ချိန်ကျရင်တော့ ရေဒီယိုနား မကပ်ရဲဘူးပေါ့လေ။ တော်ကြာ ဘောဂဗေဒတွေ ကျက်ရင်းက အာရုံတွေ အကုန်ပျံ့ပြီး “ ဈေးကွက်ယန္တယားဆိုသည်မှာမောင်ညီမလေးတို့ရေပုံပြင်လေးကတော့ ဒါပါပဲကွယ် ” တွေ ဖြစ်ကုန်မှ အခက် ;)

မောင်ဟန်ကြည် ဆယ်တန်းဖြေပြီးလို့ အိမ်မှာ လတ်လျားလတ်လျား အားနေတဲ့ တစ်ရက်သားမှာ ဖေဖေက “ ကိုင်း ငါ့သား Pheasant စက်ဘီးအသစ်တစ်စီးယူမလားကက်ဆက်တစ်လုံး ၀ယ်မလား ” လို့ မေးပါလေရော။ စိတ်ထဲရှိတဲ့အတိုင်း မညာတမ်းပြောရရင်တော့ စက်ဘီးအသစ်ကို မလိုချင်ပဲ ဘယ်နေလိမ့်တုန်း။ အရွယ်ကလည်း “ ချောင်းကြည့်ပြုံးပြန်၊ လျှောက်ပြန်သံပေး၊ ခြေအေးဝမ်းယောင် ” လုပ်ပြီး လူလုံးပြထွက်ရတဲ့ အရွယ်ကိုး။ မဒီကညာတွေ ကြည်သာဖို့အတွက် Pheasant က ခရီးမဖင့်အောင် စွမ်းဆောင်ပေးနိုင်တာကို မသိဘဲ ဘယ်နေလိမ့်တုန်း။ သို့ပေမင့် သီချင်းကြိုက်သလောက် ၀၀လင်လင် နားမထောင်ခဲ့ရဘဲ တစ်သက်လုံး မစို့မပို့သီချင်းကလေးတွေကို မ၀ရေစာ နားထောင်လာခဲ့ရတာကြီးကို စိတ်အကုန်ကြီးကုန်နေတဲ့ မောင်ဟန်ကြည်ကတော့ “ မဒီတသိုက်၊ အကြည်မဆိုက်ရင်လည်းနေ၊ ကိုယ့်စိတ်ကြိုက်ဂီတနဲ့၊ အားရအောင် စိတ်ဖြေမယ် ” လို့ စိတ်တုံးတုံးချပြီး “ ကက်ဆက် ” လို့ တစ်ခွန်းတည်း ဖြေလိုက်တာကြောင့် Samsung တံဆိပ် ကက်ဆက်အသစ်တစ်လုံး နေ့ချင်းညချင်း အိမ်ပေါ်ရောက်လာပါလေရော။ အနှီခေတ်က ကက်ဆက်တိပ်ခွေ အငှားဆိုင်တွေလည်း ခေတ်စားသေးတာမို့ မုန့်ဖိုးပြတ်လို့ အခွေမ၀ယ်နိုင်ရင် ငှားပြီး နားထောင်ရတာ ထုံးစံ။ သည်ကြားထဲမှာ “ လျှပ်စစ်ဖြင့် လောကနိဗ္ဗာန်တည်ဆောက်အံ့ ” ဆိုတဲ့ ကြွေးကြော်သံကြီးကလည်း သက်တန်း ၁၀ နှစ်ကျော်လာတာတောင် လျှပ်စစ်မီးဆိုတာ ခရမ်းချဉ်သီးလို ရဲရဲလေးဆိုတဲ့အဆင့်ကနေ မတက်သေးတာမို့ သီချင်းကလေး နားထောင်ဖို့အရေး ဘက်ထရီအိုး အလေးကြီးကို တပင်တပန်းမပြီး နေ့တိုင်းအားသွားသွင်းရတဲ့ ဒုက္ခကလည်း ဘယ်သေးလိမ့်တုန်း။ မဒီကြားမှာ ကြွားရရွား ဟန်ဓာတ်ခုတ်နိုင်မယ့် စက်ဘီးအသစ်ကို ဟင့်အင်းလုပ်ပြီး ဘီးစုတ်ကြီးတဂျောက်ဂျောက်နင်းရင်း သီချင်းတွေနဲ့ ကျေနပ်နေတဲ့ မောင်ဟန်ကြည်ကတော့ အနှီလောက်ကို ဒုက္ခလို့ ဘယ်မှတ်လိမ့်တုန်း

ဂီတဆိုတဲ့အမျိုးအစားကလည်း တယ်နတ်ကြီးသကိုး။ ဂီတကို ခံစားသက်ကလေး နည်းနည်းရလာရင် ဖန်တီးချင်စိတ်ကလေးတွေ ၀င်လာတတ်တာ သူ့သဘာဝ။ ဆယ်တန်းဖြေပြီးကတည်းက ဆယ်တန်းတွေကို စာပြ၊ ဂိုက်လုပ်နေတဲ့ မောင်ဟန်ကြည့်မှာကလည်း မိဘကို အပ်သင့်သလောက်အပ်ပြီး ကုတ်ကပ်စုထားတဲ့ ငွေယားကလေးနည်းနည်းရှိလာတာနဲ့ သူငယ်ချင်းတစ်ယောက်ဆီက ဂီတာတစ်လုံး ၀ယ်ဖြစ်သွားပါရော။ သူငယ်ချင်းများကလည်း အတော်လေး ချစ်ဖို့ကောင်းပါရဲ့။ ဂီတာတီးတတ်ဖို့အသာထားလို့ လက်ယားအောင်တောင် မကိုင်ဘူးတဲ့ မောင်ဟန်ကြည့်ကို ချစ်ခြင်းအားဖြင့် ခုနစ်အိုရှစ်ဆွေး သူ့ဂီတာကြီးကို သင့်တင့်လျောက်ပတ် များမြတ်သောဈေးနဲ့ အစွံထုတ်ထည့်လိုက်ပါလေရော။ ဘာပဲဖြစ်ဖြစ် မောင်ဟန်ကြည် အူကြောင်ကြားကတော့ ဂီတာဖြစ်ရင်ပြီးစတမ်း၊ ဒေါင်ဒေါင်မြည်ရင်ကို ကျေနပ်လို့။ အံမယ်လူကသာ ၀ါးလက်ခုပ်တောင် ဖြောင့်အောင်မတီးတတ်တာရယ် အသုံးမကျတဲ့ မာနကတော့ ခပ်ကြီးကြီး။ အနှီတော့လည်း ဂီတာတီးနည်းစာအုပ်တွေဝယ်ပြီး ကိုယ့်နည်းကိုယ့်ဟန်နဲ့ ဂီတာတီးကျင့်ပါလေရော။ အနှီလိုမှ မတီးရင်လည်း မိုးလင်း ကျူရှင်ပြ၊ နေ့ခင်းမှာ လုပ်အားပေးကျောင်းဆရာလုပ်၊ မိုးချုပ်ရင် ဂိုက်ဝင်နေရတဲ့ မောင်ဟန်ကြည့်မှာ ကျကျနန ဂီတာတီးသင်ဖို့အသာထား ယားတာတောင် မကုတ်အားဘူးကိုး။ လူကလည်း ဂီတဘက်မှာ ပါရမီပါလို့ထင်ပါရဲ့။ သုံးလေးလလောက်လည်း အချိန်လုပြီး ကျင့်လိုက်ရော C, Am, D, G ဆိုတဲ့ ဂီတာ Chord မဟာကြီးတွေကို ကျွမ်းကျင်အောင် ကိုင်တတ်တဲ့အဆင့်ကို ရောက်ပါလေရော။ အနှီလေးကွက်ကို ပတ်လည်နှက်ပြီး ဒုံ - ဂျမ်ဒုံ ဒုံ - ဂျမ် လောက်ခတ်တတ်ရင် အဆင်ပြေတဲ့ သီချင်း လေးငါးပုဒ်လောက်ကို အပိုင်အနိုင်ရအောင် လေ့ကျင့်နိုင်လိုက်တာများ နည်းတဲ့ဗီဇမှတ်လို့ ;) ။ ငါတွေ့အရ ဘာမှ ဖြစ်မြောက်အောင် မတီးတတ်ပေမင့်လည်း စာတွေ့ကတော့ လာမစမ်းလေနဲ့။ Bossa nova, Cha Cha, Hard Rock, Slow Rock ဘယ် Beat ကို ဘယ်လိုတီးရတယ် တစ်ဘားက ဘယ်လို၊ ဘားဝက်က ဘယ်ညာ၊ Key က ဘယ်ချမ်းသာဆိုတာကို အာပေါင်အာရင်းသန်သန်နဲ့ ငြင်းဖို့ဆိုရင်တော့ လာထား ;) အားအားရှိတိုင်း ဒုံ - ဂျမ် လုပ်လိုက်ပုံများတော့ ဘယ်လက်ချောင်းထိပ်က အသားမာဆိုတာ လက်သည်းညှပ်နဲ့ နေ့တိုင်းညှပ်ယူရတာတောင် အလျဉ်မမီဘူးကိုး ;)

ပြောရမယ်ဆိုရင်တော့ အနှီအရွယ် လူငယ်ဆိုတာက ရွယ်တူချင်း အုပ်ဖွဲ့ပြီး သွားကြလာကြ၊ ဆိုကြတီးကြနဲ့ အုပ်ဖွဲ့နေလေ့ရှိတဲ့အရွယ်။ သို့ပေမင့် မောင်ဟန်ကြည့်မှာက ညနေ ၆ နာရီလောက်ကတည်းက ဂိုက်ဝင်လိုက်ရတာ နှစ်ချိန်ဆက်လည်းပြီးရော ည ၁၁ ထိုး။ အနှီတော့လည်း ဘယ်သူငယ်ချင်းတွေနဲ့မှလည်း သဝေမထိုးအားဘူးကိုး။ သည်ကြားထဲမှာ တစ်ပတ်ကို တစ်ရက်အနားရလို့ သူငယ်ချင်းတွေက ဟိုအိမ်ရှေ့သွားပြီး တီးရအောင်၊ သည်အုတ်ခုံမှာ ဆိုရအောင်လို့ အဖော်စပ်တိုင်း ခြေကန်ပြီး ငြင်းပစ်တာချည်း။ ဘယ့်နှယ်ဗျာ။ ဂီတကို မြတ်နိုးတယ်ဆိုတာက တစ်ပိုင်း၊ ဂေါ်ရေးထွင်တာက တစ်ကဏ္ဍကိုး။ ကိုယ်က လမ်းဘေးအုတ်ခုံပေါ်မှာ ချမ်းချမ်းဆီးဆီးနဲ့ ကြားကြားသမျှ သောက်ညင်ကတ်အောင် သီချင်းအော်ဆို၊ ဟိုက မဒီက စောင်ခြုံပြီး သိုးနေမယ့် ကိစ္စကြီးကိုတော့ ဖီးလ်ကို နည်းနည်းမှ မလာတာ အမှန်။ သူကသာ ဇိမ်မပျက်တာကလား။ ကိုယ့်မှာတော့ ကံကောင်းရင် လေးခွစာမိဖို့ ရာနှုန်းက ခပ်များများ။ အနှီတော့လည်း “ လမ်းဘေးအုတ်ခုံမှတဆင့် ဂီတစင်မြင့်ပေါ်သို့ တက်ကြရသည် ” ဆိုတဲ့ လမ်းစဉ်ကြီးကို အာရုံမကျတဲ့ ဦးဟန်ကြည်ခမျာ ဂီတာတီးသက် နှစ်နှစ်အတွင်းမှာ C, Am, Dm, G ကနေ မတက်တာ ဘယ်ဆန်းလိမ့်တုန်း။ သို့ပေမင့် အားတိုင်းယားတိုင်း ဒုံ - ဂျမ် အလုပ်ကောင်းလိုက်တာ သူငယ်ချင်းကောင်းကြီး အင်ထုလွှတ်လိုက်တဲ့ ဂီတာဘိုးအေကြီးက သက်တန်း နှစ်နှစ်သားလည်း ရောက်ရော အိုးတွေကွာ၊ ဖလက်တံတွေပြုတ်ပြီး ဂီတာရုပ်တောင် ပျောက်သွားတာမို့ ဂီတာတစ်လုံးကုန်အောင် တီးခဲ့တဲ့ ဦးဟန်ကြည်လို့ စာတင်ရမယ်ထင်ပါရဲ့ ;)

ဦးဟန်ကြည်က အတီးမှာသာ မစွမ်းတာ အဆိုကျတော့ ပါရမီထူးဟန်တူပါရဲ့။ အဘိုးတို့ရွာက ညောင်ရေသွန်းပွဲတော်မှာ စတိတ်ရှိုးထည့်တော့ ရွာခံတွေက အချွန်နဲ့ဝိုင်းမ-တာကြောင့် စာရင်းပေး ပိုက်ဆံထည့်ပြီး ဆိုမယ့်သီချင်းကို တစ်ပတ်တိတိ အိမ်မှာ အဆိုကျင့်နေတော့ ဂီတ၀ါသနာအိုး မေမေက အသာနားထောင်နေပါလေရော။ ( အမှန်တော့ ရွာသားငတိတွေက ဦးဟန်ကြည့်အသံကို နားထောင်ချင်လွန်းလို့ စင်ပေါ်တွန်းတင်တာမှ မဟုတ်ဘဲကိုးဆိုမယ့်လူတစ်ယောက်တိုးလာတော့ တစ်ယောက်စာ ထည့်ဝင်ကြေး ပိုများတာ အသေအချာမို့ မြို့သားအူကြောင်ကြားကို ပတ်တီးချကြတာကလား ;) ) တစ်ရက်သားမှာ ကိုထီးရဲ့ “ ချစ်တာတစ်ခုတည်းသိတယ် ” ဆိုတဲ့သီချင်းကို မုဒ်အပြည့်သွင်းပြီး အပီအပြင် မျက်စိမှိတ် အဟဲကျင့်နေတဲ့ ဦးဟန်ကြည့်ဘေးကို မေမေရောက်လာပြီး “ ငါ့သားရယ်သီချင်းမဆိုဘဲ သည်အတိုင်းနေတာကမှ ငါ့သားကို စာသိပ်တော်တဲ့ ကောင်ကလေးလို့ သူများက အထင်ကြီးကြလိမ့်ဦးမယ်ဒီအသံကြီးနဲ့ စင်ပေါ်တက်ပြီး သီချင်းဆိုရင်တော့ ရပြီးသားနာမည်လေးပါ ပလုံသွားမှာ သေချာပေါက်ပဲ ” လို့ အားပေးပါလေရော။ အနှာကိုသာကြည့်ပေရော့ပါရမီ့ရှင်တွေရဲ့ ခရီးလမ်းဆိုတာ မဖြောင့်တန်းပါဘူးဆိုမှ ;) ။ ကိုယ့်သားရဲ့ ဗီဇကို ကိုယ့်အမေက အနှီလောက်တောင် အားပေးနေမှတော့ ဘယ်စိတ်ညစ်စရာ ရှိသေးလို့တုန်း ;) ။ သို့ပေမင့် သိတော်မူတဲ့အတိုင်း ဘယ်သူဘာပြောပြော ထင်ရာလုပ်လေ့ရှိတဲ့ ဦးဟန်ကြည်ပေါက်စကလည်း မေမေဘာပဲပြောပြော အချိန်ကျတဲ့အခါ စင်ပေါ်တက်ပြီး အပီဟဲပါသဗျား။ အံမယ်အနှီတော့လည်း ရွာသားတွေ အားပေးလိုက်တာများ သောင်းသောင်းဖြဖြ။ “ မမတင်ရဲ့ သားလေးက အသံကောင်းသားပဲ ” လို့ မေမေ့ကို ၀ိုင်းပြောကြတော့ မာတာမိခင်က “ အံမလေးဟယ်နင်တို့က အခုမှ နားထောင်ရတာကိုးငါ့သား အိမ်မှာ အဆိုကျင့်နေတာကိုသာ လာနားထောင်မိရင် ခဲနဲ့ပါပေါက်ချင်စိတ်ပေါက်မှာ သေချာပေါက် ” လို့ ပြောပါသတဲ့။ အင်းရွာသားတွေကလည်း အဘိုးတောင်သူကြီး မျက်နှာနဲ့ မြေးလုပ်သူ ဂီတရူးကို ဘုံမြှောက်ကြဟန်လည်း တူပါရဲ့လေ

ဘာပဲဖြစ်ဖြစ် မတီးတတ်ရင်လည်း ဆိုလို့ရတာပဲဆိုတဲ့ အသိကလေး ရင်ထဲရောက်သွားတဲ့ ဦးဟန်ကြည်ကတော့ တက္ကသိုလ်ကျောင်းသားဘ၀တလျှောက်လုံး “ ဖိုးဆိုချင် ခင်မောင်ညွန့် ” ဖြစ်ခဲ့ပါလေရော။ တကယ်တော့ ဦးဟန်ကြည့်အသံက ဘယ်သံခပ်လုံးလုံး။ အကောင်းကြီးမဟုတ်ပေမင့် လူမကြား သူမကြား သီချင်းချည်းဆိုနေခဲ့တာဆိုတော့လည်း နည်းနည်းပါးပါးတော့ လူရုပ်ပေါက်အောင် ဆိုတတ်ပေသပေါ့။ သူငယ်ချင်းတွေထဲမှာ ကိုယ့်ထက် အသံကောင်းတဲ့လူတွေမှ ဒုနဲ့ဒေး။ တကယ်တော့ စင်ပေါ်တက်ပြီး သီချင်းဆိုဖို့ဆိုတာက အသံကောင်းဖို့ထက် စင်မကြောက်ဖို့က ပိုအရေးကြီးတာကိုး။ ဟဲ ဟဲအနှီနေရာမှာတော့ ဦးဟန်ကြည်တို့က အေးဆေး။ နှစ်နှစ်ခွဲလောက် ကျောင်းဆရာလုပ်လာခဲ့မှတော့ စတိတ်စင်လောက်ကို အေးဆေးပေါ့လေ။ မိုးလင်းကနေ မိုးချုပ် ကျောင်းသားရှေ့ထွက်ပြီး ဆရာလုပ်လာခဲ့တဲ့လူဆိုတာ ထူးပြီး မျက်နှာအပြောင်ကျင့်စရာမှ မလိုတော့ဘဲကိုး ;)

ကျောင်းသားဘ၀ လွန်မြောက်ပြီး အိမ်ထောင်သည်ဘ၀ရောက်တော့လည်း ချစ်စွာသော မဒမ်ကြည်က တကယ့်ဂီတမိတ်။ သူရို့ခရစ်ယာန်ဆိုတာက သွေးထဲသားထဲမှာကို ဂီတပိုးက ပါခဲ့ကြပြီးသားဆိုတော့ ဂီတရူး ဦးဟန်ကြည်နဲ့ ဂီတမိတ် မဒမ်ကြည်ပေါင်းလိုက်တဲ့အခါ “ ဘုန်းကြီးရူးနဲ့ လှေလူး ” ( အတော်ရုပ်ဆိုးတဲ့ စကားပုံတတ်နိုင်ဘူး ဒါပဲရှိတာကိုး ;)  ) အဆင်ကိုပြေလို့။ ခက်တာက အိမ်ထောင်ရေးဘ၀အစမှာ ဂီတဖို့နေနေသာသာ မံမံတူတူမပုန်းဖို့ပဲ အသည်းအသန်ရုန်းနေခဲ့ရတာဆိုတော့ အချိန်ရှိသမျှတော့ “ နှစ်ကိုယ်တူချစ်သမျှကို ” တွေ ဘယ်လုပ်အားလိမ့်တုန်း။ တစ်ခါသားမှာ သင်တန်းကြေးငွေကလေး လုံးခနဲ ခဲခနဲရလိုက်တာမို့ မဒမ်ကြည့်ကို “ ကိုင်းမဒမ်ဘာဝယ်မလဲ လက်စွပ်ကလေးတစ်ကွင်းလောက် ၀တ်မလား ” လို့ မေးကြည့်လိုက်တော့ “ ဂီတာတစ်လုံး ၀ယ်မယ် ” လို့ ဖြေပါလေရော။ ကဲကြည့် ဂေါနေဏ ဂေါဏောပါဆိုမှ ;) အဲရတနာရှိရာ ရတနာစုပါတယ်ဆိုမှ။ အောင်မယ်ဂီတာတစ်လုံးနဲ့ လင်မယားနှစ်ယောက် ဟန်ကိုကျလို့။ ကိုယ်ကတီးလိုက် သူကဆိုလိုက်။ သူ့ဘာသာသူ တီးပြီးဆိုလိုက်။ ကိုယ်တစ်ယောက်တည်း ညည်းလိုက်နဲ့ စိတ်ကို ငြိမ်းချမ်းလို့။ သူတီး ကိုယ်တီးဆိုလို့လည်း သိပ်တော့ အထင်မကြီးလေနဲ့ အနှီအချိန်အထိ ဦးဟန်ကြည်က C, Am, Dm, G ဆိုတဲ့ ဗျူဟာကွက်ကြီးတွေအပြင် A, B, E, F နဲ့ သူ့မိုင်နာကီးတွေကို စမ်းတ၀ါးဝါး နှိပ်တတ်ရုံထက်ကို နည်းနည်းမှ မပိုသေးတာအမှန်။ ဘာပဲဖြစ်ဖြစ် ဦးဟန်ကြည် ဂီတကို မြတ်နိုးတယ်ဆိုတာ ကိုယ်တိုင်ဖန်တီး၊ ကိုယ်တိုင်ခံစားဖို့ပဲဆိုတော့လည်း ကိုယ်တီး ကိုယ်ဆို ကိုယ်နားထောင်ဟော..ပရိသတ် မဒမ်ကြည်တောင် ရှိသေးဗျာ

တောသားဦးဟန်ကြည် ရေကြည်ရာမြက်နုရာ ရှာရင်း မြို့ရောက်လာပြီး ထမင်းကိစ္စ ဟင်းကိစ္စ ခေါင်းအေးရတဲ့အချိန်ပိုင်းရောက်တော့ ရှိရင်းစွဲ ဂီတပိုးတွေ အသားကုန် ထကြွကြပါလေရော။ သင်တန်းချိန် စောစောပြီးတဲ့ ညနေခင်းတွေဆိုရင် လင်မယားနှစ်ယောက် မြို့ထဲက ကာရာအိုကေဆိုင်ချီတက်ပြီး တစ်နာရီလောက်ကတော့ ဟဲနေကျ။ တစ်လတစ်ခါလောက်မှ အနှီလို မဟဲလိုက်ရရင် စားမ၀င် အိပ်မပျော်တောင် ဖြစ်လိုက်ချင်သေး။ ခက်တာက ဦးဟန်ကြည်နဲ့ မဒမ်ကြည်က ဂီတကို မြတ်နိုးပုံချင်း တူပေမင့်လည်း ခံစားတဲ့ ဂီတအမျိုးအစားတွေက “ တစောင်းစေးနဲ့ မျက်ချေး ” ။ ဘိုလိုဝတ်သလောက် ဗမာသီချင်းကြိုက်တဲ့ ဦးဟန်ကြည်က “ ဂန္ဓမာတောင် ” တို့ “ မြမြမောင်းမောင်း ” တို့မှ နားကြောစိမ့်သလို၊ သီချင်းဆိုရင် သဟာယဆရာတင် တို့ မြို့မငြိမ်းတို့ ရေးမှ အားရတဲ့လူစား။ စိတ်လိုလက်ရရှိရင် စိန်မွတ္တားရဲ့ လက်စွမ်းပြတီးလုံးလေးနဲ့တောင် ငြိမ့်လိုက်သေးတဲ့လူ။ မဒမ်ကြည်ကတော့ “ ချမ်းချမ်း ” တို့ “ အိုင်းရင်းဇင်မာမြင့် ” တို့ “ ချစ်သုဝေ ” တို့ကို အသည်းစွဲ။ ဦးဟန်ကြည်က အာပြဲစိန်၊ လေကြီးမိုးကြီးမ လို့ သတ်မှတ်ထားတဲ့ “ ဖြူဖြူကျော်သိန်း ” ( ဟဲ ဟဲဦးဟန်ကြည်ကတော့ မည်းမည်းကျော်သိန်း လို့ ခေါ်တာပဲ ; ) ) ဆိုရင် ကတုံးပေါက်ကေ နှုတ်ခမ်းတလန် ပန်းတလန်နဲ့ ထော်ပြရွဲ့ပြပြီး ဆိုထားတဲ့ ပထမဆုံးအခွေကတည်းက အားပေးလိုက်တာ အခုထိ။ ဘာပဲဖြစ်ဖြစ် ဂီတချစ်သူချင်းဆိုတော့လည်း အချင်းချင်း အိုခေမှာ စိုပြည်အောင် ညှိရတာပေါ့လေ။

လွန်ခဲ့တဲ့ သုံးလေးရက်ကတော့ ဦးဟန်ကြည် အွန်လိုင်းပေါ်မှာ မွှေရင်းနှောက်ရင်း ၀င်ထားတာ အတော်ကြီးကြာနေပြီဖြစ်တဲ့ “ ၇၀-၈၀-၉၀ ခုနှစ် သီချင်းသည်များ ” ဆိုတဲ့ အုပ်စုရဲ့ wall ကို အမြီးပြန်ခေါင်းပြန်မွှေရင်း ကိုယ်ငယ်ငယ်က နားစွန်နားဖျားပဲ ကြားခဲ့ဖူးတဲ့ သီချင်းတွေကို ဒေါင်းယူပြီး ပြန်နားထောင်ကြည့်တော့ စိတ်တွေကို နုပျို၊ လန်းဆန်းလာပါလေရော။ ငယ်ငယ်က သီချင်းကို သည်အရွယ်ရောက်မှ ပြန်နားထောင်တယ်ဆိုပေမင့်လည်း အရသာမပျက်တဲ့အပြင် နားဝင်ပီယံတောင် ပိုရှိနေတာ အံ့သြစရာ။ လူဆိုတာ ကျန်တဲ့နေရာမှာ အရွယ်အလိုက် အကြိုက်ပြောင်းချင်ပြောင်းမယ်၊ ဂီတနဲ့ပတ်သက်ရင်တော့ ငယ်ဘ၀ရဲ့ ဂီတကို ဘယ်အရွယ်ရောက်ရောက် နားဝင်ချိုနေတုန်းကိုး။ ကိုယ်စွဲခဲ့တဲ့ သီချင်းတွေကို ပြန်နားထောင်ရ ပြန်ညည်းရတဲ့အရသာ ချမ်းမြေ့ချက်ကတော့ ပြောမယုံ ကြုံမှသိမယ်ထင်ပါရဲ့။ လူဆိုတာ အစားကောင်းစားရရင် ချစ်တဲ့သူကို သတိရစမြဲဆိုတော့လည်း အနှီသီချင်းလေးတွေ နားထောင်ရတဲ့အခါ မဒမ်ကြည်အတွက်လည်း သီချင်းရှာရပေသပေါ့လေ။ တင်ဇာမော်တို့ မဒီတို့သီချင်းလေးတွေ ဒေါင်းပြီး မဒမ်ကြည့်ကို ပေးလိုက်တော့ မဒမ့်မျက်နှာက ပြုံးလို့။ ဂီတမိတ် ပြုံးတယ်ဆိုတော့ ဂီတရူးလည်း စိတ်ချမ်းသာပေသပေါ့လေ။

နှစ်ဦးညီမျှ
ဂီတနိဗ္ဗာန်
တေးသံသာယာ
အိမ်ဂေဟာတွင်
ပျော်ရွှင်ချမ်းမြေ့
နေ့ရက်တိုင်းသည် မင်္ဂလာ . . .။    

လက်ရှိအချိန်မှာတော့ ဂီတမိတ် မဒမ်ကြည်က သူ့သူငယ်ချင်းဆီမှာ စန္ဒယားအတီးသင်နေသလို ဂီတရူး ဦးဟန်ကြည်ကလည်း ဂီတာတီး သင်တန်းတက်ဖို့ စိုင်းပြင်းနေပါကြောင်း။ အကြောင်းအခွင့်တိုက်ဆိုင်ရင်တော့ မဒမ်ကြည်က တယောထိုး သင်ဖို့ စိတ်ကူးထားပြီး ဦးဟန်ကြည်ကလည်း ပတ္တလားတီးသင်ဖို့ အိပ်မက် မက်နေပါကြောင်း သတင်းပေးလိုက်ပါရစေဗျား :D



( ဟန်ကြည် )
၇.၁၀.၂၀၁၄ ( အင်္ဂါနေ့ )

6 comments:

Aunty Tint said...

ဆရာဟန်ရဲ့ ငယ်ဘ၀ကစလို့ ဂီတနဲ့ပတ်သက်ပြီး မက်မက်စက်စက် စီကုံးခဲ့တာလေးတွေ ကြည်နူးစွာဖတ်သွားပြီးတဲ့ သကာလ Pheasant စက်ဘီးအသစ်တစ်စီးအစား ကက်ဆက်ကိုရွေးခဲ့တယ်ဆိုတာ မအံ့သြတော့ပါဘူး :) လူကြီးတွေကို အလိုလိုက်ရတဲ့ခေတ်မှာ ကြီးပြင်းခဲ့ပေမယ့် တီတင့်ရဲ့ ဖေဖေနဲ့မေမေက တီတင့်ထက်အဆပေါင်းများစွာ ဂီတ၀ါသနာထုံသူမို့ အိမ်မှာတူရိယာတစ်ဝိုင်းစာရှိခဲ့တယ် ဟာဟ။
ဆရာဟန်တို့ စုံတွဲရဲ့ ဂီတခံစားမှုနှစ်သက်ပုံချင်း မတူတာက တီတင့်တို့စုံတွဲနဲ့ တစ်ထပ်ထဲပဲ :D

မဒမ်ကိုး said...

အဲဒါမှန်းသိရင်ဆြာရယ် ဟိုဒင်နာညက တက်ပြီးချီးမျြင့်ခိုင်းပါတယ်ဗျာ ဟိ

Anonymous said...

အလွန်သင့်လျော်သောသင်တန်းများဖြစ်ပါကြောင်းအားကျချီးမွမ်းသွားပါသည်။
အို်င်အိုရာ

blackroze said...

အိမ်မက်တွေ ဖြစ်ပါစေဆရာဟန်ရေ
ပစ်လည်း ငယ်တုန်းကတော့
ဂစ်တာလေး ကိုင်ပြီး ဒုံချမ် ဒုံချမ်တော့ လုပ်ဖူးသားးး

စံပယ်ချို said...

ဆရာ ဖတ်ပြီးပြုံးမိပါသေးတယ် ကျွန်မတို့အိမ်ကလဲ တအိမ်လုံး သီချင်းကြိုက်တတ်တယ် ကျွန်မက သီတင်းရေးတဲ့သူဖြစ်ချင်ခဲ့တာပါ ငယ်ငယ်ကတဲကပေါ့
ဖြစ်မလာဘူးဆရာရေ-----တင်ဇာမော်တို့မဒီတို့ကို ဂျက်လဲကြိုက်တယ်

သူကြီးမင်း (တုံးဖလား) said...

ဆရာဟန်တုို့ စုံတွဲကတော့ တကယ့်စံပေဘဲ။
ရှေ့သွားနောက်လုိုက် ညီပါပေ့။

နောက်ဆုို ဆရာဟန်တုို့ ဇနီးမောင်နှံရဲ့ လက်သံ နှုတ်သံလေးတွေ အွန်လုိုင်းမှာ နားဆင်ခွင့်များ ရလေငြားအံ့လည်းမသိ။း)

ကြိုက်ရင်ပေါ့လေ . . .

Powered By Blogger