Friday 24 December 2010

ခရစ်တော်နှင့် ပိုက်ဆံအ်ိတ် . . .

နောက်နာရီဝက်ဆိုရင်
ခရစ်ယာန်ဘာသာဝင်တို့ရဲ့ သခင်ခရစ်တော် မွေးဖွားသန့်စင်တဲ့ အချိန်အခါသမယကို ရောက်ပါတော့မယ်။ တစ်နည်းပြောရရင်တော့ ထူးမြတ်တဲ့ ခရစ်စမတ်အခါတော် ရောက်ပါတော့မယ်။

အခါတိုင်းနှစ်တွေဆိုရင် ဒီညမျိုးမှာ အိမ်ရှင်မနဲ့အတူ ခရစ်စမတ်ကူစောင့်ရင်း ဘုရားသီချင်းဆိုဖို့ ဂစ်တာတီးပေးနေကျပါ။ သူများတွေကတော့ သက်ဆိုင်ရာ ဘုရားကျောင်းမှာ ခရစ်စမတ်ကြိုကြရင်း ပျော်ကြပါးကြပေမယ့် ကိုယ်နဲ့အနေများလို့ ကိုယ့်စိတ်ဓာတ်ပါကူးကုန်တဲ့ အိမ်ရှင်မကတော့ ဘုရားကျောင်းသွားပြီး ကုသိုလ်တစ်ပဲ ငရဲတစ်ပိဿာဖြစ်မှာကို စိတ်မပါတော့တာကြောင့် အခါတော်ကျမှပဲ ဘုရားကျောင်းသွားတာ များပါတယ်။ ဒါကလည်း ကလိယုဂ်ဆုတ်ကပ်ဆိုတဲ့ သဘာဝအရ ဘာသာတရားတွေက မွန်မြတ်ကြပေမယ့် ဘာသာဝင်တွေ၊ ဘာသာရေးခေါင်းဆောင်တွေက အားနည်းလာတာကို ပြနေသလိုပါ။ ဘယ်သူတွေတရားပျက်ကြပေမယ့် ကိုယ်တိုင်တရားမပျက်ဖို့လည်း အမျိုးသမီးကို မကြာမကြာ အားပေးရတာ ပြန်သတိရဖြစ်ပါတယ်။

ညနေက အိမ်ရှင်မနဲ့ ဖုန်းဆက်ဖြစ်တော့ နောက်နှစ်ဆန်းပိုင်းမှပဲ ပြန်လာမယ်လို့ ဆိုပါတယ်။ မောင်နှမတွေ စုံစုံလင်လင် တွေ့ကြတဲ့ပွဲဖြစ်တာမို့ ပျော်နေကြပုံရလို့ မုဒိတာပွားရပါတယ်။ ကိုယ့်မှာလည်း အခုထိမမြင်သေးတဲ့ ယောက်ဖတွေ၊ ခယ်မတွေကို အဝေးကလှမ်းပြီး ဖော်လံဖားနေရတာလည်း တစ်နေ့တစ်နေ့ အမောပါ။ ပါသွားတဲ့ လက်ဆောင်တွေ မျက်နှာကြောင့်လား၊ တကယ့်အရှိကိုများပြောသလား မတွေးတတ်ပေမယ့် ညနေက ဖုန်းဆက်တော့ ခယ်မတော်က “တို့အစ်ကိုကြီးက ချောတယ်”လို့ လှမ်းပြီး ထောပနာပြုလိုက်တာကြောင့် ငချိတ်ရောင်ကဲပြီး သပိတ်လိုမဲနေတဲ့ ဦးဟန်ကြည်တစ်ယောက်တော့ ဖရဏာပီတိမှာ ဂွမ်းဆီထိပြီး
“လိုတာရှိလဲ လှမ်းမှာနော်”လို့ အဆစ်ကလေးပါ ထည့်ပြောလိုက်မိပါကြောင်း...။ ။

စကားချပ်။ ။
ပါသွားတဲ့ ပိုက်ဆံတွေ ကုန်သွားတာကြောင့် ဘဏ်ဖွင့်ရင် ပိုက်ဆံလွှဲပေးဖို့ အိမ်ရှင်မက ရာဇသံပေးတဲ့အတွက် ဦးဟန်ကြည်တစ်ယောက် ပိုက်ဆံအိတ်ကို ပွတ်နေမိပါကြောင်း...

No comments:

ကြိုက်ရင်ပေါ့လေ . . .

Powered By Blogger