ဆားပုလင်းဟန်ကြည်ရဲ့ တစ်ညနေ . . .

ဆရာတစ်ယောက်ရဲ့ ဘ၀ဟာ မလွယ်ပါလို့ ပြောမိရင်

ညည်းတော့မယ်လို့ ထင်ကောင်းထင်နိုင်ပါတယ်။ ညည်းချင်းတော့ ဖြစ်ကောင်းဖြစ်နိုင်ပေမယ့် သနားသောအားဖြင့် ရင်ဖွင့်လွှာလို့ ခပ်ဖေါ့ဖေါ့လေးတွေးပေးဖို့ အရင်မေတ္တာရပ်ခံရင် ကောင်းမလားစဉ်းစားမိပါရဲ့။ ဘာပဲဖြစ်ဖြစ် ရေးတဲ့လူက ရေးချင်သလိုရေးပြီး တွေးတဲ့လူက တွေးချင်သလိုတွေးကြမှာမို့ ဘာနိဒါန်းမှ မချီချင်တော့ပါ။

 

ဦးဟန်ကြည်တစ်ယောက် ဆေးထိုးအပ်တွေပစ်ချပြီး Whiteboard Marker ကောက်ကိုင်လို့ စာသင်တဲ့အလုပ်ကိုလုပ်နေတာ ဘယ်လိုအခြေအနေများရှိသလဲလို့ မေးချင်မြန်းချင်သူတွေရှိကောင်းရှိမယ်ထင်ပါရဲ့။ မရှိလည်း ရေးဖို့စိတ်ကူးပြီးသားမို့ ရေးဖြစ်အောင်ကို ရေးမှာပါပဲ။ ကိုယ့်ဖာသာမေးပြီး ကိုယ့်ဖာသာဖြေရရင် တစ်ခုမှမလွယ်ပါလို့ပဲ ဖြေရပါလိမ့်မယ်။ ပို့စ်တစ်ခုမှာ ရေးခဲ့ဖူးသလို ဆရာဝန်ဆိုတာ လူတွေရဲ့ အသက်နဲ့ အလုပ်လုပ်ရတဲ့ လူတန်းစားဖြစ်ပြီး ကျောင်းဆရာဆိုတာ လူတွေရဲ့ ဘ၀နဲ့အလုပ်လုပ်ရသူတွေဖြစ်တာမို့ ပေါ့ပေါ့ဆဆလုပ်လို့ရတဲ့ အလုပ်တစ်ခုမှမရှိပါ။ လက်ရှိအလုပ်ကို ဂုဏ်တင်ပြီးပြောရရင် ဆရာဝန်တစ်ယောက်ဟာ လူနာတစ်ယောက်ကို အများဆုံးတာဝန်ယူရရင် တစ်ပတ်ဆယ်ရက်လောက်ပဲ ရှိပြီး ကိုယ်တို့အလုပ်ကတော့ အနည်းဆုံးဆယ်လကတော့ တာဝန်ယူုရပါတယ်။ ဒါပေမယ့် ဘာပဲလုပ်လုပ် ကောင်းကောင်းလေးလုပ်ချင်တဲ့ ကိုယ့်အတွက်ကတော့ ကိုယ့်ကျောင်းသားတွေ ဘ၀တစ်ခုအောင်အောင်မြင်မြင် မဖြစ်သမျှတာဝန်ယူုနေမိတာမို့ အချိန်ကန့်သတ်ချက်တောင် မရှိတော့ပါ။

 

ဒီကြားထဲမှာ

ဆရာ့ဝတ်ထဲမှာပါတဲ့ ကျင့်ဝတ်တွေထဲမှာ သင့်ရာအပ်ပို့ဆိုတဲ့ ကျင့်ဝတ်ကလည်း ဦးဟန်ကြည်တိုို့ကို မလှုပ်နိုင်အောင် ချည်ထားပါသေးရဲ့။ သင့်ရာအပ်ပို့ဆိုတဲ့ အဓိပ္ပာယ်က ဆိုးတဲ့ကလေး ဆိုးသလိုလွှတ်ထားလိုက်ဆိုတဲ့ အဓိပ္ပာယ်ပါနေသေးပေမယ့် ဆရာတစ်ယောက်အတွက် တပည့်ဆိုးဆိုတာ ရှိတာမှမဟုတ်တာပဲလေ။

 

ဒီညနေခင်းကိုပဲ ဥပမာပေးချင်ပါရဲ့...

 

ဒီနေ့နေ့လည်ပိုင်းက စာသင်ဖို့ ၀ိုင်းတစ်ဝိုင်းကိုရောက်တော့ ကိုယ့်ကျောင်းသားက အိမ်မှာမရှိပါ။ ကျောင်းသားသုံးယောက်ချပေးထားတဲ့ဝိုင်းမှာ ကျောင်းသူတစ်ယောက်ပဲ ရှိနေပါတယ်။ ဒီကျောင်းသားနှစ်ယောက်မှာ အဓိကကျောင်းသားကိုအဖော်ရအောင် နောက်တစ်ယောက်ကို တွဲထည့်ပေးထားရတာမို့ ခေါင်းဆောင်လုပ်တဲ့ အဲဒီကျောင်းသားအကြောင်းကိုပဲ ပြောရပါလိမ့်မယ်။ ဒီဝိုင်းကို စဖွင့်ပေးထားတာ တစ်ပတ်ကျော်ပဲရှိသေးပေမယ့် အဲဒီမောင်ကျောင်းသား ကျောင်းပျက်တာ ၄ရက်ရှိပါပြီ။ လာအပ်ကတည်းက သူတို့ကျောင်းသားက ထိန်းလို့မရတဲ့အကြောင်း ပွင့်ပွင့်လင်းလင်းပြောထားပြီးသားပါ။ ဘာပဲဖြစ်ဖြစ် ဆရာဟူသည်မှာ ကျောင်းသားဆိုးတွေကို လမ်းမှန်ရောက်အောင်ပြုပြင်ပေးဖို့ တာဝန်အရှိဆုံးလူသားလို့ ခံယူထားတာမို့ လက်ခံထားလိုက်ပါတယ်။ ဒီကျောင်းသားမှာ အဖေမရှိတော့ပါ။ အမေကလည်း အဖေပေးထားခဲ့တဲ့ ရောဂါကြောင့် ကျန်းမာရေးက သိပ်မကောင်းပြန်ပါ။ ပိုဆိုးတာက အမေဖြစ်သူကလည်း သူ့သားကို ထိန်းသိမ်းနိုင်စွမ်းမရှိတာမို့ ဦးလေးဖြစ်သူက အစစလိုက်ပြီး ထိန်းပေးနေရပါတယ်။

ဒါက ကိုယ့်ရဲ့ချစ်စွာသော ကျောင်းသားတစ်ယောက်ရဲ့ အခြေခံအချက်အလက်တွေပဲ ဖြစ်ပါတယ်။ မောင်ကျောင်းသားကို ကျောင်းနေဖို့အရေးမှာ ဦးလေးဖြစ်သူက ဆိုင်ကယ်အသစ်တစ်စီး ၁၈သိန်းတန်ကို ၀ယ်ပေးရတဲ့ အပြင် ကွန်ပြူတာသစ်တစ်စုံ ၆သိန်းတန်လောက်ကိုလည်း ၀ယ်ပေးရပြန်ပါတယ်။ အဲဒီမှာတင် မြင်းကိုချိုတပ်ပေးလိုက်တဲ့ကိန်းဆိုက်တော့တာမို့ ဆိုင်ကယ်တစ်စီးနဲ့ ပြဲပြဲစင်အောင် လည်ပါပတ်ပါတော့တယ်။ မုန့်ဖိုးကိုလည်း ဖောဖောသီသီပေးကြတာမို့ ငွေရွှင်နေပြန်တော့ အပေါင်းအသင်းကလည်း များလာပြန်ပါတယ်။ ဒီကလေးက အရင်ကတည်းက ရာဇ၀င်လေးတွေနဲ့ ကလေးဖြစ်ပြန်တော့ ပိုလို့သာဆိုးပါတော့တယ်။ ခက်နေတာက စာသင်ချိန်ကို ရောက်ပြန်ရင်လည်း အာရုံစိုက်ပြီးသင်နေပြန်တာမို့ ကိုယ့်မှာပစ်ရမှာလည်း အဆီဝင်းဝင်း စားရမှာလည်း သဲနဲ့ရှပ်ရှပ်ဆိုတဲ့ကိန်း ဆိုက်နေပါတော့တယ်။

ဆရာကိုယ်တိုင် အိမ်တိုင်ယာရောက်လာသင်နေပါလျှက်နဲ့ နှစ်ရက်ဆက်တိုက် ကျောင်းလစ်နေတော့ ကိုယ်လည်း တော်တော်လေးတော့ ဒေါကန်လာပါတော့တယ်။ ကိုယ့်အယူအဆကလည်း ငွေပေးချင်သလောက်ပေး ပညာကိုတန်ဖိုးမထားရင် နည်းနည်းမှ သင်ချင်စိတ်မရှိပါ။ ကြိုးစားတဲ့ကျောင်းသား၊ စိတ်ဓာတ်ကောင်းတဲ့ ကျောင်းသားကို ထမင်းပါကျွေးပြီး အလကားသင်ပေးချင်တဲ့ဆရာဖြစ်နေတာမို့ စိတ်ထဲမှာ တော်တော်လေးကို မကျေမနပ်ဖြစ်တယ်လို့ မညာတမ်းဝန်ခံပါရစေ။ ဒါနဲ့ သူ့ဦးလေးကို လှမ်းခေါ်ပြီးမေးရပါတော့တယ်။ သူတို့အိမ်ကလည်း ဈေးသမားတွေဖြစ်တာမို့ နေ့လည်ပိုင်းဆိုရင် အိမ်မှာ လူကြီးဆိုလို့ တစ်ယောက်မှ မရှိကြပါ။

ဦးလေးဖြစ်သူရောက်မှ တပည့်ကျော်ရဲ့ ဂုဏ်ပုပ်(ဂုဏ်ပုဒ်မဟုတ်ပါ)တွေကို နားနဲ့မဆံ့အောင် ကြားရပါတော့တယ်။ မနေ့က စာသင်ချိန်မှာ အပြင်လည်နေတာကို ဦးလေးဖြစ်သူက ဆုံးမတော့ ဦးလေးကို ရိုင်းရိုင်းစိုင်းစိုင်း ခံပက်ပါသတဲ့။ အပြင်မသွားအောင်ဆိုင်ကယ်သိမ်းမယ်ဆိုပြန်တော့ ဆိုင်ကယ်သော့ကို ပစ်ပေါက်ပြီးပေးပါလေရောတဲ့။ ဒါတင်မကသေးဘဲ ဦးလေးဖြစ်သူကို ဒါးတရမ်းရမ်းနဲ့ ရန်ရှာဖို့ လုပ်ပါသတဲ့။ ဘယ်လောက်များ ချစ်ဖို့ကောင်းပါလိမ့်။ ကျောင်းမနေတော့ဘူးလို့လည်း ပြောပါသတဲ့။ ဘယ်သူ့အတွက် ကျောင်းနေခိုင်းတယ်ဆိုတာတောင် မသိတဲ့ကလေးပါ။ ဒါတင်မကသေးပဲ အမေဖြစ်သူက ဆူတဲ့အခါလည်း အမေကို ခွန်းကြီးခွန်းငယ်ပြန်အော်ပါသတဲ့။ အမေနဲ့ မျက်နှာချင်းဆိုင်ထိုင်ပြီးစကားပြောတာမှာ ခြေထောက်ကို စားပွဲပေါ်တင်ပြီး အမေ့မျက်နှာဘက်ကို သူ့ခြေထောက်ထိုးထားပါသေးသတဲ့။ ဒီလိုသားမျိုးလေးများ စိတ်ကူးနဲ့သာ မွေးကြည့်ပေတော့။ ဒီကြားထဲမှာ အမေက ဘာမိဘတာဝန်တွေကျေလို့လဲ ဆိုတဲ့ စကားနဲ့ပါ စော်ကားလိုက်ပါသေးတယ်။

ခပ်ရှင်းရှင်းပြောရရင် ကိုယ့်ပုဒ်မထဲမှာ မိဘကို စော်ကားတဲ့ပုဒ်မဟာ အမုန်းဆုံးပုဒ်မဖြစ်နေတာမို့ ဒီကျောင်းသားကို ပညာသင်ပေးချင်စိတ် နည်းနည်းမှ မကျန်တော့ပါ။ ကိုယ့်ပညာနဲ့ မတန်ဘူးလို့လည်း ဆုံးဖြတ်ပြီး ဖြစ်နေပါပြီ။ ဒါပေမယ့် ကိုယ်ကသာ မျက်နှာလွှဲလိုက်ရင် ဘယ်သူကမှ သူ့ကို ပညာသင်ပေးတော့မှာ မဟုတ်မှန်းသိနေပြန်တာမို့ ဦးလေးဖြစ်သူကို ဖြောင်းဖျရပြန်ပါတော့တယ်။ ကျောင်းသားဆိုးတွေကို ကိုင်တွယ်ခဲ့တဲ့ ကိုယ့်အတွေ့အကြုံတွေကို ဖောက်သည်ချရင်း နည်းဗျူဟာပါ ချပေးရပြန်ပါတယ်။ ကိုယ့်ခမျာလည်း ကျောင်းသားဆိုးတွေကို ပြုပြင်ပေးနိုင်တယ်ဆိုတဲ့ နံမည်ထွက်နေပြန်တော့ ကိုယ့်ဆီကိုလာအပ်ကြရင် ဆရာမနိုင် နှစ်ဆောင်ပြိုင်တွေက များနေပါတယ်။ အင်း...Surveillance (ဆားပုလင်း)ဆိုတာ လူဆိုးထိန်းကို ခေါ်တာမို့ ကိုယ်ကလည်း ဆားပုလင်းနှင်းမောင်ထက်သာတဲ့ ဆားပုလင်းဟန်ကြည်များ ဖြစ်နေရော့သလားမသိ။  ကိုယ့်စိတ်ရင်းအတိုင်းသာဆိုရင် (ဆရာလုပ်နေတာလည်း မဟုတ်ခဲ့ရင်) ပေါင်၁၀၀တောင်မပြည့်တတ်တဲ့ ဒီမောင်ကျောင်းသားလူရိုင်းကို နာရင်းပဲ ပိတ်အုပ်ချင်စိတ်ပေါက်နေတာ ၀န်ခံပါတယ်။ ဒါပေမယ့် သင့်ရာကိုပို့ရမယ့် ဆရာ၊ မသင့်သင့်အောင်လုပ်ပေးရမယ့် ဆရာဟူသည်...ဆိုပြန်တော့လည်း...

ဒီတစ်ယောက်အရေးပြီးပြန်တော့ နောက်တစ်ရေးက ပေါ်ပြန်ပါတယ်။ ရန်ကုန်မှာ စီးပွားရေးတက္ကသိုလ်တက်နေတဲ့ ကိုယ့်ကျောင်းသူတစ်ယောက်က တစ်စခန်းထထားတာပါ။ ဒီကျောင်းသူတွေက ညီအစ်မနှစ်ယောက်လုံး ကိုယ့်ဆီမှာ တပြိုင်တည်း ဆယ်တန်းတက်ကြတာပါ။ ၀ိဇ္ဇာတွဲတွေဖြစ်ပြီး အပေါင်းအနုတ်တောင် မတတ်တာကြောင့် တခြားဆရာတွေက လက်မခံတာကို ဒေါပွလွန်းတာကြောင့် ကိုယ်ပဲသင်ပေးခဲ့တာပါ။ ဒါပေမယ့် ဒီကလေးနှစ်ယောက်လုံးက ကြိုးစားအားရှိပေမယ့် ဥာဏ်ရည်နိမ့်လွန်းတာကြောင့် ပထမတစ်နှစ်မှာ နှစ်ယောက်လုံးကျပါတယ်။ အဲဒီမှာတင် လူကြီးတွေက ကျောင်းမထားတော့ဘူးလို့ လုပ်နေတာကြောင့် ကိုယ့်ကျောင်းသားတွေ ကြိုးစားတာကိုသိနေတဲ့ ကိုယ်ကိုယ်တိုင်ပဲ လူမိုက်လုပ်ပြီး ပထမနှစ်က သင်တန်းကြေးရဲ့တ၀က်ပဲယူတဲ့အပြင် ဒီကလေးနှစ်ယောက်ကျရင် နောက်နှစ်စာသင်မစားဘူးဆိုတဲ့ ကတိပါပေးပြီး မိုက်မိုက်ကန်းကန်းသင်ခဲ့ရတာပါ။ သူတို့လူကြီးတွေကလည်း ထားချင်လွန်းလို့မဟုတ်ဘဲ ကိုယ့်ကိုယ်အားနာတာကြောင့် ထားတာလို့ နောက်ပိုင်းမှာ ကိုယ့်ကိုပြောကြပါတယ်။ ဇာတ်လမ်းကို ခပ်တိုတိုချုပ်ရရင် နောက်တစ်နှစ်မှာညီအစ်မနှစ်ယောက်လုံး အောင်ကြပါတယ်။ သူတို့သာ မအောင်ရင် ကိုယ်လည်း ဒီလောကထဲမှာ အခုချိန်အထိ ရှိနေမှာမဟုတ်တော့ပါ။ ကလေးတွေဘ၀အတွက် စားနေတဲ့ ထမင်းလုပ်ပါ အရင်းလုပ်ပြီး သင်ခဲ့ရဖူးပါရဲ့။

ညီမဖြစ်သူက အမှတ်တော်တော်ကောင်းပါတယ်။ ဘောက ၇၄၊ သမိုင်း ၇၂ ရတာကြောင့် ဂုဏ်ထူးနဲ့ သီသီလေးပဲ လွဲခဲ့တာမို့ ကိုယ်လည်း တော်တော်လေး အားရခဲ့ပါတယ်။ ဒီကလေးတွေ ကျောင်းဆက်ထားမယ်အလုပ်မှာ မပါမပြီးတဲ့ ကိုယ်ပဲတာဝန်ယူပြီး တက္ကသိုလ်ဝင်ခွင့် လျှောက်ပေးရပြန်ပါတယ်။ ညီမဖြစ်သူက သူတို့အမြင့်ဆုံးတက်ခွင့်ရတဲ့ စီးပွားရေးတက္ကသိုလ်ကို မီနေတာကြောင့် သူကလည်း တက်ချင်ပေမယ့် သူတို့လူကြီးတွေက အိမ်နဲ့ဝေးလွန်းတဲ့ဒေသဖြစ်တာကြောင့် မတက်စေချင်ပါ။ နီးနီးနားနားမြို့မှာ ရိုးရိုးဘွဲ့ပဲ ယူစေချင်ကြပါတယ်။ ကြိုးစားတဲ့ကလေးကို ဆုလာဘ်ရစေချင်တဲ့ ကိုယ်ကပဲ လူကြီးတွေကိုဖြောင်းဖျ၊ ကိုယ့်ကျောင်းသူကို အာမခံပြီး ရန်ကုန်စီးပွားရေးတက္ကသိုလ်ကို တက်ခိုင်းလိုက်ပါတော့တယ်။ ကိုယ့်ရည်ရွယ်ချက်က ရိုးရိုးလေးပါ။ ဒီကျောင်းသူအတွက် ဘ၀အာမခံချက်ရစေချင်တဲ့အပြင် ငွေကြေးတတ်နိုင်ကြပြီး ပညာမတတ်ကြတဲ့ သူတို့အိမ်အတွက်လည်း လုပ်ငန်းကြီးကြီးလုပ်ရာမှာ အထောက်အကူဖြစ်စေချင်တာပါ။

ဒါပေမယ့် ထင်သလိုမဖြစ်တဲ့ လောကနိယာမအတိုင်း ကိုယ့်ကျောင်းသူက ကျောင်းတက်လို့ တစ်လမပြည့်ခင်မှာပဲ ရည်းစားထားပြီး ကျောင်းပြေး၊ ပန်းခြံထဲသွားထိုင်၊ ခရီးတွေထွက်ပြီး ဆရာ့မျက်နှာကို အိုးမည်းတင်မက ကတ္တရာပါ အားပါးတရ သုတ်ပါတော့တယ်။ သူ့ကို စိတ်မချရဲတော့တာကြောင့် သူ့အိမ်က လူတစ်ယောက်ပါ ရန်ကုန်သွားနေပေးရပါတော့တယ်။ ကိုယ့်တပည့်တွေကို အင်မတန်မှယုံလွန်းတဲ့ (ယုံရလောက်အောင်လည်း ဆယ်တန်းတစ်နှစ်လုံးမှာ ကျောင်းစာတင်မကပဲ ဘ၀နဲ့ပတ်သက်တဲ့ ခံယူချက်အပြင် အတွေးအခေါ်ဗဟုသုတအစ၊ ဘာသာရေးအဆုံးအမအထိ ဖြည့်ပေးလိုက်ပြီးသားပါ) ဆရာဖြစ်သူကတော့ ဒါတွေကို တစ်ခုမှမသိဘဲ ထင်တစ်လုံးနဲ့ ကျေနပ်နေခဲ့ပါတယ်။ ဒီကျောင်းသူ ပထမနှစ်ဝက်အပြီးရောက်မှ သူတို့အိမ်က ကိုယ့်ကိုဖွင့်ပြောပြီး အကူအညီတောင်းတော့တာကြောင့် သိရပါတော့တယ်။

ဒီညီအစ်မနှစ်ယောက်စလုံးမှာ မိဘတွေတကွဲတပြားနဲ့မို့ ဘွားအေ၀မ်းကွဲက ကလေးအရွယ်ကတည်းက အစစပြုစုစောင့်ရှောက်ပြီးကျောင်းထားပေးခဲ့တာပါ။ ဒါကြောင့်မို့လည်း ကိုယ်က သူတို့ဘ၀ကို အမြင့်ဆုံးမရောက်တောင် ကိုယ့်ခြေထောက်ပေါ်ကိုယ် ရပ်နိုင်တဲ့ အဆင့်ထိရောက်စေချင်မိပါရဲ့။ ပထမနှစ်ဝက်မှာ စောစောက ပြောခဲ့သလို ဇာတ်လမ်းတွေဖြစ်လာတာမို့ သူတို့အိမ်က သူ့ကို ရန်ကုန်မှာ မတက်စေချင်တော့ဘဲ အနီးအနားဒေသမှာတင် ရိုးရိုးဘွဲ့တစ်ခုကို ယူခိုင်းဖို့ စိတ်ကူးဖြစ်လာပါတော့တယ်။ တစ်မျိုးလုံး တစ်ဆွေလုံးကလည်း အဲဒီအတိုင်း တစ်သံတည်းထွက်လာပါတော့တယ်။ ခက်တာက သူတို့ကလေးက လက်မခံဘဲ ခါးခါးသီးသီးငြင်းနေတာမို့ နောက်ဆုံးကယ်တင်ရှင် ဦးဟန်ကြည်ကို အကူအညီတောင်းကြပြန်ပါတော့တယ်။ အင်း ... သင့်ရာအပ်ပို့ ဆရာတို့ မဟုတ်ပါလား။

အကြောင်းစုံသိလိုက်ရတဲ့အခါ ကိုယ်စိုက်ခဲ့တဲ့အပင်တစ်ပင် အပွင့်ပွင့်ပြီး အသီးသီးကာနီးမှ ပိုးထိုးသွားတာ မြင်လိုက်ရတဲ့ ဥယျာဉ်မှူးတစ်ယောက်လိုပဲ တော်တော်လေးကို ယူကြုံးမရဖြစ်ရပါတော့တယ်။ တက္ကသိုလ်ကျောင်းသား ရည်းစားထားတာ မဆန်းပါ။ ဒါပေမယ့် ကျောင်းတက်ပြီး တစ်လမပြည့်ခင်ရည်းစားထားလိုက်တာကတော့ ရည်မှန်းချက်ပျောက်သွားမှန်း သိသာလွန်းနေပါရဲ့။ ဘ၀မေ့သွားတာလည်း ငြင်းစရာမလိုအောင် ရှင်းရှင်းကြီးပေါ်နေပြန်ပါတယ်။ အနာဂတ်အတွက် အားကိုးအားထားပြုဖို့ဆိုတဲ့ စ်ိတ်ကူးလည်း ခပ်ဝါးဝါးပဲ ကျန်ပါတော့တယ်။ ဒါပေမယ့် ကလေးတစ်ယောက်ရဲ့ ဘ၀ နိမ့်ကျတာမမြင်ချင်တဲ့ ဆရာဖြစ်သူဦးဟန်ကြည်ခမျာ သူ့အစား သူ့လူကြီးတွေကို ဖြောင်းဖျပြီး နောက်တစ်ခါ အခွင့်အရေးထပ်ပေးဖို့ ချစ်စွာသော တပည့်မကိုယ်စား တောင်းပန်ရပါတော့တယ်။ ဒါကိုတော့ ကိုယ့်တပည့်မ သိမှာမဟုတ်ပါ။ သူတို့လူကြီးတွေကို သုံးနာရီလောက်ကြာအောင် ရှင်းပြပြီးတော့ သဘောပေါက်သွားကြပေမယ့် ဆရာ့တပည့်ကို ဆရာပဲဆုံးမပေးပါဆိုပြီး အပ်ကြပြန်ပါတယ်။ ကိုယ့်မှာလည်း အားတဲ့တစ်ရက်ကျရင် အိမ်ခေါ်ပြီးဆုံးမပေးပါဦးမယ်လို့ ကတိပေးလိုက်ရပါတော့တယ်။ ဒါပေမယ့် ကိုယ့်အလုပ်နဲ့ကိုယ် ဂျင်ချေလည်နေတာမို့ လေးငါးရက်ကြာတဲ့ အထိအကောင်အထည်မဖော်ဖြစ်သေးတာမို့ သူတို့လူကြီးတွေက ကိုယ့်ကိုယ်တွေ့တိုင်း ဆုံးမပေးဖို့ အားကိုးတကြီးပြောပါတော့တယ်။

ဒီညနေကပဲ စောစောက မောင်ကျောင်းသားအရေးကို ဖြေရှင်းပေးပြီး နောက်တစ်ဝိုင်းမဆက်ခင်မှာ ချစ်စွာသော တပည့်မအိမ်ဝင်ပြီး သူတို့ရဲ့ဆရာက သူတို့အတွက် သိက္ခာကိုထပ်ပြီး ရင်းဦးမယ့်အကြောင်း တပည့်မကို နားဝင်အောင် ရှင်းပြရပါတယ်။ နောက်ရက်မှာ အိမ်ကိုလာဖို့လည်း ပြောရပါသေးတယ်။ မပြီးသေးသောပန်းချီကားကို ထပ်ဆွဲသလို အသိဥာဏ်မပြည့်သေးတဲ့ ကိုယ့်တပည့်မကို လိုအပ်တာတွေ ထပ်ဖြည့်ဆုံးမပေးဖို့ပါ။ အင်း...သင့်ရာအပ်ပို့ဆိုတာ ဘယ်အထိများပို့ခိုင်းပါလိမ့်လို့ ကိုယ့်ကိုယ်ကိုပဲ မေးရမလား၊ ရှေးသူဟောင်းတွေကိုပဲ ပြန်မေးရမလား မသိတော့ပါ...

တိုင်းပြည်မှာ အရေးအကြီးဆုံး အလုပ်က ဦးဟန်ကြည်တို့ရဲ့ ပညာရေးအလုပ်ပါ။ တိုင်းပြည်တစ်ခုကို တည်ထောင်လို့ရသလို ဖျက်ဆီးနိုင်တာလည်း ဦးဟန်ကြည်တို့ပါ။ စာသင်ရတာ အင်မတန်လွယ်ပေမယ့် ဆရာကောင်းတစ်ယောက်ဖြစ်အောင် လုပ်ရတာ တစ်ဘ၀လုံးပုံအောလိုက်ရတာမို့ အင်မတန်ခက်လှပါတယ်။ ဒါပေမယ့် ဘာကြောင့်များ ကျူရှင်ဆရာလို့ပြောလိုက်ရင် အများစုက အထင်အမြင်သေးကြပါလိမ့်နော်...။

သင့်ရာအပ်ပို့တစ်ခုတည်းနဲ့တင် တစ်ဘ၀စာပေးလိုက်ရတဲ့ ဆရာတစ်ယောက်ဟာ ကျန်တဲ့ အတတ်လည်းသင်၊

ပဲ့ပြင်ဆုံးမ၊

သိပ္ပမချန်၊

ဘေးရန်ဆီးကာ ဆိုတဲ့

ဆရာ့ကျင့်ဝတ်တွေအတွက် ဘယ်လောက်အထိ အချိန်ပေးလိုက်ရမယ်၊ ဘ၀တွေရင်းလိုက်ရမယ်ဆိုတာ စဉ်းစားကြည့်နိုင်ပါတယ်။ ဒါတင်မကသေးဘဲ ဦးစီးဦးဆောင် နာယကတွေဖြစ်နေပြန်တဲ့ ဆရာ့မှာ

ထကြွနိုးကြား၊

သနားသည်းခံ၊

ဝေဖန်ထောက်ရှု၊

ဤခြောက်ခု ကြီးသူ့ကျင့်ဝတ်တာလို့

ဆိုပြန်တဲ့ ကျင့်ဝတ်တွေကိုလည်း ပြည့်အောင်ဖြည့်ရပြန်တဲ့အခါ...

ဦးဟန်ကြည်တစ်ယောက် အခုထိကို ဆရာကောင်းတစ်ယောက် ပြည့်ပြည့်၀၀ မဖြစ်နိုင်သေးပါ။

ကိုင်း...လွယ်တယ်ထင်ရင်လည်း စမ်းလိုက်ကြပါစို့လား။