“ ရွာ . . . ”

ရွာအ၀င်လမ်း
မန်ကျည်းတန်း
လှမ်းလာလှည့်ပါ တို့ကျေးရွာ...

ရွာလမ်းမြေညီ
စိန်ပန်းနီ
ညီညာစီတန်း ပြေးမြင်စမ်း...

ရွာ့တောင်ဘက်မှာ
စမ်းရေပြာ
သာယာချမ်းမြ ကြည်လင်စွ...

ရွာ့မြောက်ဘက်ခြမ်း
လယ်စခန်း
စိမ်းလန်းဝင်းဝါ ပြည့်ဝမ်းစာ...

ရွာဦးထိပ်မှာ
စေတီသာ
သာယာဆည်းလည်း ချမ်းမြေ့ဆဲ...

ရွာနောက်တစ်ခွင်
တောရိပ်ဆင်
ဘ၀င်အေးမြ ရှုတိုင်းလှ...

ရွာသားရွာသူ
စိတ်ထားဖြူ
ညီတူရိုင်းပင်း ဖြောင့်မတ်ခြင်း...

ရွာဘုရားပွဲ
နှစ်စဉ်နွှဲ
ခြိမ့်သည်းပျော်ကြ တောအလှ...

ရွာမှာမွေးဖွား
အို..ရွာသား...
သင်ဖွားရာမြေ၊ သင့်ချက်ကြွေသည်
စိန်ရွှေများစွာ၊ မချမ်းသာလည်း
မြန်မာစိတ်ရင်း၊ ငြိမ်းချမ်းခြင်းနှင့်
ချစ်ခြင်းများစွာ၊ ကြွယ်ဝပါသည့်
ကန္တာတွင်းက အိုအေစစ်...။ ။

( ဟန်ကြည် )
၂၆.၂.၂၀၁၄ ( ဗုဒ္ဓဟူးနေ့ )

“ မနက်စာ . . . ”

   

ထောပတ်ဗလာ
မပါဒိန်ခဲ
နို့လည်းနတ္ထိ
မရှိပေါင်မုန့်
ဟန်လုပ်မျိုချ မနက်စာ...

ထမင်းကြမ်းခဲ
ပန်းကန်ထဲထည့်
ဆီလည်းမပါ
ရရာထန်းလျက်
အသာလျက်ရင်း
သွတ်သွင်းမျိုချ မနက်စာ...

ရှိတာမျိုချ
အာဟာရပြတ်
သေတတ်ခဲ့ရင်
တစပြင်မှာ
နေရာရတာ ကြာလှပြီ...

နှလုံးသားမှာ
ကဗျာတစ်စ
အာဟာရဖြစ်
သွေးသစ်သွန်းလောင်း
နှစ်ပေါင်းများစွာ ရှင်သန်နေ...။ ။

( ဟန်ကြည် )
၂၇.၁.၂၀၁၄ ( တနင်္လာနေ့ )

photo credit to Google.

“ မဇ္ဈိမ . . . ”

ဦးဟန်ကြည်တို့ တိုင်းပြည်မှာ အစွန်းမရောက်အောင် အစွန်းမထွက်အောင် အစွန်းလွတ်အောင် နေကြ ပြောကြ အားထုတ်ကြ ဆိုတဲ့ ဆုံးမစကားကို လူတိုင်း နားယဉ်ပြီးသား...ဘာသာတရား အဆုံးအမမှာလည်း မဇ္ဈိမပဋိပဒါ ( အလယ်အလတ်လမ်းစဉ် ) ကို လိုက်နာ ကျင့်သုံးကြရမယ်လို့ အတိအလင်း ပါပြီးသား...သီချင်းတွေထဲမှာလည်း တစ်ဖက်စွန်းရောက်ခြင်းရဲ့ ဆိုးပြစ်တွေကို ထည့်ရေးလေ့ရှိပါရဲ့...ဆရာလိတ်ရဲ့ သီချင်းထဲမှာ -
“ ဘယ်နေရာမဆို...တစ်ဖက်စွန်းရောက်ရင်...တစ်ယောက်တော့ နစ်နာရစမြဲ...” လို့ ရေးထားတာကိုပဲ ကြည့်...

သို့ပေမင့် ဦးဟန်ကြည်တို့ လူမျိုးက အသိခေါက်ခက် အ၀င်နက်တဲ့နေရာမှာ နိုးတူး...တစ်တိုင်းပြည်လုံးကလူတွေကို သတ္တုချကြည့်ပြီး ဆရာကျော်ဝင်းပြောတဲ့ စကားနဲ့ ပြောရရင်တော့ ထစ်ခနဲရှိရင် ချချင်နှက်ချင်တဲ့ “ ရွှေဘ ” နဲ့ ဘာပဲဖြစ်ဖြစ် သည်းခံလိုက်တာ ကောင်းပါတယ်ဆိုတဲ့ “ ဇေယျ ” တွေချည်း...( ရွှေဘနဲ့ ဇေယျဆိုတာကတော့ ရုပ်ရှင်ခေတ်ဦးတုန်းက မင်းသားကြီးတွေပေါ့လေ…ရွှေဘကတော့ မဟုတ်မခံ…နည်းနည်းလေး အစွန်းထွက်တာနဲ့ ဆော်လိုက်နှက်လိုက်တာချည်း...ရိုးရိုးကြီးဇေယျကတော့ မှားမှားမှန်မှန် သည်းခံပြီး ခေါင်းငုံ့နေတတ်တဲ့ ဇာတ်ရုပ်တွေချည်း သရုပ်ဆောင်လေ့ရှိတဲ့ မင်းသားကြီးပေါ့ဗျာ… ) အမှန်ကတော့ သည်နှစ်နည်းစလုံးက အစွန်းနှစ်ဘက်ကိုး...သည်တော့လည်း တစ်ယောက်မဟုတ် တစ်ယောက်မှာတော့ ဆိုးကျိုးတွေချည်း ဖြစ်ကုန်ပါလေရော...

ဦးဟန်ကြည် ပုဂံသွားတုန်းက ဆုံဖြစ်ခဲ့တဲ့ တူးရစ်အမျိုးသမီးတစ်ယောက်ရဲ့ အပြုအမူလေးကို သတိထားမိတော့မှ ကိုယ့်လူမျိုးတွေမှာ ကိုယ်ကအစ မတိုးတက်ရခြင်းရဲ့ အကြောင်းရင်းကို တိတိပပ သတိထားမိတော့တာကလား... ပုဂံမှာတုန်းက ဦးဟန်ကြည်တို့ တည်းတဲ့ ဟိုတယ်မှာ အနှီ အင်္ဂလိပ်တူးရစ်မကလေးနဲ့ အပေါင်းအဖော်တွေ တည်းကြတာဆိုတော့ မနက်တိုင်း ညတိုင်း ဆုံဖြစ်နေကြ...ကြာတော့လည်း အချင်းချင်း မျက်မှန်း တမ်းမိကြပေသပေါ့...

တစ်ညသားမှာ ဟိုတယ်အောက်ထပ်က ဧည့်ဆောင်မှာ ဦးဟန်ကြည်တို့ လေပန်းနကြတုန်း တူးရစ်မကလေးနဲ့ အပေါင်းအဖော်တွေ လည်ရာပတ်ရာက ပြန်လာကြပါလေရော...အနှီတူးရစ်မလေးက ဧည့်ကြိုကောင်တာမှာ ၀င်ပြီး ရေသန့်ဗူးဝယ်တာပေါ့လေ...သည်အချိန်အထိ ဦးဟန်ကြည်တို့လည်း သတိမထားမိသေးဘူးပေါ့...တူးရစ်မလေး စကားပြောသံကြားမှ ခေါင်းလှည့်ကြည့်မိပါလေရော...

ဖြစ်ပုံက သည်ဟိုတယ်မှာ ရေသန့်တစ်ဗူးကို ၄၀၀ နဲ့ ရောင်းတာကိုး...အပြင်က ဆိုင်တွေမှာက တစ်ဗူးကို ၃၀၀...ဇေယျဦးဟန်ကြည်တို့ကတော့ သြော်...၁၀၀ လေးများတာများ ပြောမနေတော့ပါဘူးဆိုတဲ့ စိတ်ကူးနဲ့ အေးဆေးပေါ့...သို့ပေမင့် သည်တူးရစ်ကလေးကတော့ သည်လိုမဟုတ်ဘဲကိုး...သည်ဟိုတယ်မှာ ရေသန့်တစ်ဗူးကို ၄၀၀ နဲ့ ရောင်းတဲ့အတွက် အပြင်ဆိုင်တွေထက် ၁၀၀ ပိုများနေတယ် ကျွန်မ၀ယ်တာ သုံးဗူးရှိသွားပြီဆိုတော့ ၃၀၀ ပိုသွားပြီ တဲ့...ဒါကြောင့် သည်ရေသန့်တစ်ဗူးကို ပိုက်ဆံမယူပါနဲ့ လို့ ကောင်တာက စာရေးကို အေးအေးဆေးဆေးကလေး ရှင်းပြနေတာကိုး...

အနှီလို ရှင်းပြနေတဲ့ တူးရစ်မလေးရဲ့ မျက်နှာမှာ ဒေါသလည်း မရှိသလို မခံချိမခံသာဖြစ်နေတဲ့ အမူအယာလည်း မရှိပေါင်ဗျာ...သူရသင့် ရထိုက်တာကို အေးအေးဆေးဆေးနဲ့ ယုံကြည်မှုရှိရှိ ရှင်းပြနေတာပါပဲ...ကောင်တာစာရေးကလည်း ခပ်ပြုံးပြုံးနဲ့ ရေသန့်တစ်ဗူးအတွက် ပိုက်ဆံမယူပဲ ထားလိုက်ရတော့တာကိုး...သည်ကလေးမ တော်လိုက်တာ ပါးနပ်လိုက်တာ လို့ ဦးဟန်ကြည်ရဲ့ စိတ်ထဲကနေ အကြိမ်ကြိမ် ချီးကျူးလိုက်မိပါရဲ့...

ဦးဟန်ကြည်တို့ ရွှေပြည်သားတွေကတော့ အနှီလို ဘယ်ဟုတ်လိမ့်တုန်း...ဇေယျဦးဟန်ကြည်တို့ကတော့ တစ်ရာတည်းနဲ့ ပြောမနေတော့ပါဘူးဆိုပြီး ညစ်တဲ့လူ ရောင့်တက်လာအောင် အားပေးအားမြှောက်လုပ်ကြပါသဗျား...ရွှေဘစိတ်သမားများကတော့ စာမရီမျိုးဟေ့ အမွေးတစ်ပင် အကျွတ်မခံဘူး...နင်တို့က ဘာကောင်တွေမို့ အမြတ်ကြီးစားရသလဲ လူပါးဝလှချေလား ဘာလား ညာလားနဲ့ သတ်ပွဲကြီးဖြစ်ကြမှာ သေချာပါရဲ့...ပါသွားတဲ့ ငွေတစ်ရာကတော့ ပြန်ရမရ မသေချာဘူးပေါ့...ဟောကြည့် သူများလူမျိုးများကျတော့ ဘယ်လောက် ပါးနပ်လိုက်သလဲ...ပြဿနာလည်း မဖြစ် အပြုံးလည်းမပျက် လိုချင်တာလည်းရ...သြော် ငါတို့လူမျိုးတွေ မဇ္ဈိမလို့ တွင်တွင်ကြီး အော်နေပေမယ့် အလယ်အလတ်လမ်းစဉ်နဲ့ အောင်မြင်မှုယူနိုင်ကြတဲ့အထဲမှာ ငါတို့တွေ မပါခဲ့ပါလားလို့ တွေးမိပြီး ရှက်လိုက်လေခြင်းဗျာ...

တကယ်ဆိုရင် မြန်မာငွေ ၁၀၀ ကျပ်ဆိုတာ သူရို့ အင်္ဂလိပ်ငွေ ပေါင် နဲ့တွက်လိုက်ရင် ဘယ်နှစ်ပြားမှ မတန်တဲ့ ငွေပမာဏကလေး...ဦးဟန်ကြည် သတိထားမိသလောက် သည်အင်္ဂလိပ်မကလေးကလည်း ကပ်စေးမဟုတ်ပေါင်ဗျာ...လမ်းမှာတွေ့တဲ့ ကလေးတွေကို ၅၀၀ တစ်မျိုး ၁၀၀၀ တစ်မျိုး ထုတ်ပေးနေတာ တွေ့ဖူးပါရဲ့...သည်ငွေကလေး ၁၀၀ ကို ရအောင်ယူသွားတာက ငွေကြေးတန်ဖိုးထက် သူရသင့်ရထိုက်တဲ့ အခွင့်အရေးကို ကာကွယ်သွားတာပဲလို့ သဘောပေါက်လိုက်မိတဲ့ ဦးဟန်ကြည်မှာ ကိုယ့်လုပ်ရပ်တွေကို ပြန်စဉ်းစားကြည့်မိရင်း ခေါင်းတောင် မဖော်ဝံ့တဲ့အထိ...လွန်ခဲ့တဲ့ လေးနှစ်ကျော်လောက်ကတည်းက ရင်ထဲမှာ စွဲနေတဲ့ သည်ဖြစ်ရပ်ကလေးက ဦးဟန်ကြည်ကို ပညာတွေ အများကြီး သင်ပေးခဲ့တာကိုး...

လောကကြီးမှာ ဘယ်ပြဿနာကိုပဲဖြေရှင်းဖြေရှင်း သူရောကိုယ်ပါ နှစ်ဦးနှစ်ဖက် အဆင်ပြေမယ့် နည်းလမ်းတွေ အများကြီးရှိသေးတယ်ဆိုတာကို ဦးဟန်ကြည်တို့ သတိမူမိဖို့ ကောင်းလှပါပြီ...မဇ္ဈိမဆိုတာကြီးကို အပြောမဟုတ် အလုပ်နဲ့ သက်သေပြဖို့ သင့်လှပါပြီ ကိုယ့်ဆရာတို့ရေ...။ ။

( ဟန်ကြည် )
၁၈.၂.၂၀၁၄ ( အင်္ဂါနေ့ )

“ လည်ပြန်တစ်ချက် . . . ”

ဆရာစိုင်းခမ်းလိတ်က ခြင်္သေ့လည်ပြန်...အဆိုတော် ၀ိုင်ဝိုင်းက သမင်လည်ပြန်...ကဗျာဆရာ ညွန့်ဝေ ( ကသာ ) က လည်ပြန်အငဲ့...သာမညောင်ည ဦးဟန်ကြည်ကတော့ လည်ပြန်တစ်ချက်ပေါ့ဗျာ...အချိန်နဲ့အမျှ ထမင်းလုပ်နေရတဲ့အတွက် တစ်ချက်ထက်ပိုပြီး လည်မပြန်အားဘူးကိုး...တစ်ချက်ပဲ ပြန်ကြည့်တာကြောင့် ခပ်ဝေးဝေးကိုတော့ မမြင်တော့ဘူးပေါ့လေ...

ခပ်ဝေးဝေးကို မမြင်တာပဲ ကောင်းပါရဲ့...ဖြတ်သန်းခဲ့တဲ့ ဘ၀သမိုင်းကြောင်းက ပန်းမွှေ့ယာ ရွှေကော်ဇောမှ မဟုတ်ခဲ့ဘဲကိုး...ဘ၀ခရောင်းတောမှာ မောနေအောင် လျှောက်ခဲ့ရတာတွေက ခပ်များများဆိုတော့လည်း ပြန်မတွေးချင်တော့တဲ့ အတိတ်တွေက ခပ်များများ ရှိနေပါလေရဲ့...သို့ပေမင့် အတိတ်ဆိုတာ ကိုယ့်သမိုင်းကြောင်းတွေချည်း မဟုတ်လား...မပိုင်ချင်လို့ ပစ်ထားခဲ့တယ်ဆိုပေမင့် မဆိုင်ချင်လို့လည်း ရမှမရတော့ပဲကလား...

မိဘအရိပ်အာဝါသအောက်မှာ အပူအပင်ကင်းကင်းနေခဲ့တဲ့ ငယ်ဘ၀ဆိုတာကတော့လည်း ငိုစရာအမေ့ရင်ခွင် အားကိုးစရာ အဖေ့ခွန်အား ရှိနေတာမို့ ဘယ်အခက်အခဲမဆို မိသားစု ညီညီညွတ်ညွတ်နဲ့ ဖြေရှင်းခဲ့ကြလေတော့ ဘယ်လောက်ပဲမောတယ်ပြောပြော ပျော်ပျော်ကြီး မောခဲ့ကြရတာမဟုတ်လား...ကိုယ့်မြင်းကိုယ်စိုင်းပြီး စစ်ကိုင်းပဲ ရောက်ရောက် ကိုယ့်လှေကိုယ်ထိုးပြီး ပဲခူးပဲရောက်ရောက် ကိုယ်ထင်ခုတင်ရွှေနန်းထုံးကို နှလုံးမူပြီး မိဘရင်ခွင်ကနေ ထွက်လာခဲ့ပြီဆိုကတည်းက ဘ၀သင်ခန်းစာတွေ လောကကြီးရဲ့ ခပ်ကြမ်းကြမ်း ပညာပေးတာတွေကို ကော့နေအောင် ခံခဲ့ရပါရဲ့...

ဦးဟန်ကြည်ရဲ့ မေမေက အသက်အစိတ်ဝန်းကျင် သားတော်မောင်ကို “ ငါ့သားရယ် နင့်အသက်က ငယ်ပါသေးတယ် ” လို့ ပြောတဲ့စကားကို ကြားခါစကတော့ ဇောင်းကြွနေတဲ့ ပညာမာန်ကလေးက ရှေ့ဆောင်နေတော့ မခံချင်ခဲ့ဘူးပေါ့လေ...သူများနိုင်ငံမှာဆိုရင် အသက် ၁၈ နှစ်ပြည့်တာနဲ့ လူကြီးဖြစ်တာပဲလို့ လိုရာဆွဲတွေးပြီး ငါ လူလားမြောက်ပြီလို့ပဲ ထင်ခဲ့မိပေသပေါ့...သို့ပေမင့် မိသားစုဆိုတဲ့ ခံတပ်ထဲကနေ အပြင်ထွက်ပြီး လောကကြီးနဲ့ စီးချင်းထိုးတဲ့အခါကျမှပဲ “ သြော်...ငါ့မေမေက ငါ့ကို ငယ်တယ်ပြောတာ လူသက်ကို ပြောတာမှ မဟုတ်ဘဲ...ဘ၀အတွေ့အကြုံနဲ့ဆိုင်တဲ့ လောကအသက်ကို ပြောတာပဲ ” လို့ သဘောပေါက်ယူခဲ့ရပါရဲ့...အင်း အနှီလို သဘောပေါက်တဲ့အချိန်ကျတော့ နှလုံးသားထဲမှာရော အစာအိမ်မှာပါ ဒဏ်ရာတွေ ဗလပွဖြစ်နေပြီပေါ့လေ...

ကိုယ့်နောက်ကို ပြန်လှည့်ကြည့်ရင် ကျောပဲရှိတဲ့ ဒေသ...အိပ်မက်တောင် မမက်ခဲ့ဘူးတဲ့ နယ်ကြမ်းမြေကြမ်းမှာ ၀မ်းတစ်ထွာအတွက် ကိုယ့်ပညာလေးကို အားကိုးပြီး ရုန်းပဟဲ့ ဆိုကတည်းက အတွယ်ခံ အနှက်ခံလိုက်ရတဲ့ ဒဏ်ချက်တွေများ ကျကျနနသာ ရေးမှတ်ထားမယ်ဆိုရင် A4 စာရွက် တစ်ထုပ်တောင် မလောက်တာ သေချာပါရဲ့...သြော် လူဆိုတာမျိုးကလည်း ဘုန်းကြီးခေါင်းကို ခေါက်ချင်တဲ့လူတွေချည်း ပညာတတ်တစ်ယောက် နိမ့်လာပဟဲ့ဆိုရင် ခြေနဲ့ကျောက်ချင်တဲ့လူတွေချည်းကိုး...ဦးဏှောက်တစ်လုံးကလွဲရင် ဘာမမရှိတဲ့ ခြေမဲ့လက်မဲ့ဘ၀ဆိုတော့လည်း အနင်းခံ အနှိမ်ခံ အစော်ကားခံလိုက်ရများ တစ်ခါတစ်ခါ ငါများ သူတို့ကို ဘာတွေ စော်ကားမိလို့ပါလိမ့်လို့ တွေးယူရတဲ့အထိ...ခေါင်းထဲက ပညာဆိုတာကလည်း တန်ဖိုးနားမလည်တဲ့လူတွေကြားမှာ လက်ထဲကိုင်ထားတဲ့ ငှက်ပျောသီးလောက်တောင် အလေးပေးမခံခဲ့ရဘူးကိုး...

ကျောင်းသင်ခန်းစာဆိုတာက သင်ရိုးကုန်သွားရင် ပညာစုံပြီလို့ သတ်မှတ်လို့ရပေမင့် ဘ၀သင်ခန်းစာဆိုတာမျိုးက သင်ရိုးကျွတ်တယ်လို့မှ မရှိပဲကိုး...သည်လူတစ်ယောက်က သည်ပုံစံနဲ့ ကိုယ့်ကိုစော်ကားမော်ကားလုပ်သွားတာကို ဘယ်လောက်ပဲ ပညာယူမှတ်သားထားပေမင့် နောက်တစ်ယောက်က နောက်တစ်မျိုး စော်ကားလာရင် ခံရပြန်သေးတာပါပဲလေ...ဘယ်လောက်ပဲ စိတ်ရှည်လက်ရှည်နဲ့ လူတွေအပေါ် စေတနာထားချင်နေပါစေ အစော်ကားချည်းခံနေရပြီဆိုမှဖြင့် “ တစ်ကွေ့ကွေ့တော့ တွေ့ကြသေးတာပေါ့ ” ဆိုတဲ့ မာန်တွေ ဒေါသတွေ ထွက်လာကြစမြဲမဟုတ်လား...ဆရာကြီး ရွှေဥဒေါင်းရဲ့ စကားလုံးနဲ့ ပြောရရင် “ အသည်းထဲမှာ ဆူးကြီးတစ်ချောင်း ထွက်လာတယ် ” ပေါ့...ဦးဟန်ကြည်တို့ ဘ၀အစက အနင်းအနှိပ်ခံရပုံများကတော့ အသည်းထဲမှာ ထွက်လာလိုက်တဲ့ဆူးတွေဟာ များလွန်လွန်းလို့ ဥပမာလှလှပေးရမယ်ဆိုရင် နှလုံးသားခမျာ ဆူးပတ်လည်ရံထားတဲ့ ဒူးရင်းသီးနဲ့တောင် ခပ်ဆင်ဆင်ဖြစ်လာတဲ့အထိ...

လူ့လောကထဲကို စ၀င်ခါစအရွယ်တုန်းကတော့ တော်ရုံအခက်အခဲဆိုရင် “ အတွေ့အကြုံ ” လို့ သဘောထားလိုက်တာမို့ ထမင်းငတ်ရင်လည်း ပျော်ပျော်ကြီးပေါ့လေ...၀တ်စရာမရှိရင်လည်း ပျော်ခဲ့တာပါပဲ...ဦးဟန်ကြည်ကလည်း ခပ်ငယ်ငယ်ဘ၀ကတည်းက ပညာအရည်အချင်းနဲ့ ငွေကြေးစည်းစိမ် အဆောင်ယောင် ဆိုတာကို နှလုံးသားချမ်းမြေ့မှုလောက် မက်မက်စက်စက် ရှိခဲ့တာမှ မဟုတ်ဘဲကိုး...သို့ပေမင့် သာမန်လူ့အန္ဓဆိုတာမျိုးကျတော့ အဆောင်အယောင်တို့ အစီးအနင်းတို့ အရှိန်အ၀ါတို့ဆိုတာတွေကို အင်မတန် အလေးထားကြတာကလား...အနှီတော့လည်း သူရို့အလေးထားတာတွေ ဘာတစ်ခုမှ မပိုင်ဆိုင်ခဲ့လေတဲ့ ဦးဟန်ကြည်ကို အထင်အမြင်သေးကြ နင်းကြနှိပ်ကြပေမပေါ့လေ...မရှိခိုးနိုး မလှစုန်းယိုးဆိုတာ လူတွေရဲ့ အကျင့်ဆိုးကြီးကိုး...

ဦးဟန်ကြည်ဆိုတာကလည်း လူတိုင်းအပေါ်မှာ ဖြူဖြူစင်စင် စိတ်ထားဖို့ကိုပဲ ဦးစားပေးခဲ့တဲ့ လူစားဖြစ်ပြန်တော့ ကိုယ့်ကိုယ်တစ်ခါလောက်စော်ကားတာမျိုးဆိုရင် သတိကို မထားမိခဲ့တာကလား...သို့ပေမင့် တစ်ခါကနှစ်ခါ နှစ်ခါက သုံးခါ ဖြစ်လာရင်တော့လည်း သတိထားမိပြီပေါ့...ဘယ်အရာမဆို တစ်ကြိမ်ဆိုတာ အတွေ့အကြုံအနေနဲ့ ပျော်ဖို့ကောင်းပေမယ့် သုံးလေးကြိမ်ဖြစ်လာရင် အတွေ့အကြုံမဟုတ်တော့ဘဲ ဘ၀ဖြစ်လာပြီဆိုတော့ ပျော်စရာမဟုတ်တော့ဘူးပေါ့လေ...ခံရဖန်များလာတဲ့အခါကျမှ “ သြော်...သင်းတို့က အသက်မရှိတဲ့ အရာတွေအပေါ်မှာ သိပ်အလေးထားကြတာကိုး...သည်အသက်မရှိတဲ့အရာတွေပေါ်မှာ လူတစ်ယောက်ရဲ့ တန်ဖိုးကို စံတိုက်ချင်ကြတာကိုး... ” လို့ သဘောပေါက်လာပါလေရော...အနှီလို သဘောပေါက်လာတဲ့အခါကျမှ ကိုယ့်အနေအထိုင်ကို ပြန်ဆင်ခြင်မိတော့တာကလား...

အဆောင်အယောင်ဆိုတာကို အာသီသမရှိတဲ့ ဦးဟန်ကြည်က ရိုးရိုးကုပ်ကုပ်နေပေမင့် သင်းတို့အမြင်မှာတော့ ငမွဲ ငချာပေါ့လေ...လူကို အထင်မကြီးမှတော့ ပညာကိုလည်း တန်ဖိုးမထားကြတော့ဘူးပေါ့...ဘယ်သူမဆို ကိုယ့်ပညာနဲ့ ကိုယ့်ဂုဏ်သိက္ခာကိုတော့ မြတ်နိုးကြတဲ့လူတွေချည်း မဟုတ်လား...ငွေကြေးချမ်းသာလာအောင် ဗြုန်းခနဲ ဒိုင်းခနဲ ထလုပ်လို့ ရပေမင့် ပညာတတ်တစ်ယောက် ဖြစ်လာအောင်ဆိုတာ တစ်ရက်တစ်မနက်တည်းနဲ့ ဖြစ်တဲ့အရာမျိုးမှ မဟုတ်ဘဲ...နှစ်ပေါင်းများစွာရင်းနှီး အချိန်ပေါင်းများစွာ ပေးဆပ် ပျော်ရွှင်မှုပေါင်းများစွာ စတေးမှ သည်နေ့သည်ပညာဆိုတာ ရလာတဲ့အမျိုး...အနှီတော့လည်း ကကြီးကို ပုတ်လောက်ရေးပြတာတောင် မှန်အောင်မဖတ်နိုင်တဲ့ လူတန်းစားက ကိုယ့်ပညာကို စော်ကားတဲ့လုပ်ရပ်ကို ဦးဟန်ကြည် ဘယ်သည်းခံနိုင်ပါ့မလဲဗျာ...ဆင်ကြီးကို ခွေးဟောင်တာ အနေအထိုင်မပျက်ပေမင့် ဟောင်ပါများရင်တော့ ဆင်ကြီးလည်း နားငြီး စိတ်ရှုပ်လာတော့တာ သဘာဝကိုး...

အနှီတော့ .ခြင်္သေ့ဆီဆိုတာ သိင်္ဂီရွှေခွက်နဲ့မှ တင့်တယ်သလို...ပတ္တမြားကို ရွှေကွပ်မှ ဖြစ်တော့မှာဆိုတာကို သဘောပေါက်လာတော့လည်း ကိုယ်မက်မက်စက်စက်မရှိခဲ့တဲ့ ငွေကြေးတို့ အဆောင်အယောင်တို့ကို ဖြည့်ဆည်းဖို့ ကြိုးစားရပြန်တာပါပဲ...သည်လိုကြိုးစားရင်း ထမင်းငတ်တဲ့အနပ်ပေါင်းလည်း မရေနိုင်ဘူးပေါ့လေ...ခြစ်ခြစ်တောက်ပူလောင်နေတဲ့ နေပြင်းအောက်မှာ စက်ဘီးကလေး တဂျောက်ဂျောက်နင်းပြီး ထမင်းဖြစ်အောင် ရုန်းခဲ့ရတဲ့ ကာလတွေကို အခုနေပြန်ပြောရင်တော့ ပုံပြင်တွေချည်းပေါ့...ပညာရေးလောကကြီးမှာ ခြေကုပ်တစ်နေရာရဖို့ မေးငေါ့စကားတွေ အမနာပ အတင်းအဖျင်းတွေ အကြောင်းမဲ့ထိုးခံရတဲ့ မျက်စောင်းတွေအားလုံးကို စာတစ်စောင်ပေတစ်ဖွဲ့ရေးပြရရင် ယုံကြည်မဲ့လူရှိဖို့တောင် ခပ်ရှားရှား...

သည်နေ့သည်အချိန်ရောက်ပြီး နေရာကလေးတစ်ခု ခိုင်ခိုင်မာမာရလာပြီး သူဌေးမင်းမဟုတ်ပေမင့် အကြွေးကင်းကင်းနဲ့ နေနိုင်တဲ့ အနေအထားဖြစ်လာတဲ့အခါမှာ ရလာတဲ့ ဆုံးရှုံးမှုကတော့ ဘယ်လူကိုမှ မယုံကြည်တော့သလို ဘယ်သူ့ကိုမှ မသနားတတ်တော့တဲ့ စိတ်ဓာတ်ကြီးပေါ့လေ...သို့ပေမင့် စေတနာကို ဝေဒနာမဖြစ်အောင်ထားတတ်လာတာကတော့ အမြတ်လို့ပဲ ဆိုရတော့မှာပေါ့...အထိုက်အလျောက် ထမင်းလေးဝလာပေမယ့် ကိုယ်ဖြတ်သန်းခဲ့တဲ့ ဘ၀ကို မမေ့ဖို့ ငတ်တစ်လှည့်ပြတ်တစ်လှည့်နဲ့ တိုက်ပွဲဝင်ခဲ့ရတဲ့ အချိန်ပိုင်းတွေကို သတိရနေဖို့ ဘ၀သမိုင်းအစက ရဲဘော်ရဲဘက်ဖြစ်တဲ့ စက်ဘီးကလေးကို ခုတင်ပေးမှာ ထောင်ထားပြီး ကိုယ့်ကိုယ်ကို ဆုံးမနေဖြစ်တာ သည်နေ့အထိပဲလို့ ဆိုကြပါစို့...သူတောင်းစား ထမင်းဝရင် ဘုရင်လုပ်ချင်တယ်ဆိုပေမင့် ဦးဟန်ကြည် ထမင်းဝလာတဲ့ သည်နေ့အထိတော့ ဘုရင်လုပ်ချင်စိတ်လည်း လားလားမှ မပေါ်ဖူးတာအမှန်...သို့ပေမင့် ကိုယ့်ထမင်းလေးကိုယ်စား ကိုယ့်အလုပ်လေးကိုယ်လုပ်ပြီး လူကိုမမြင် ငွေကိုမင်တဲ့ ရွှေပြည်သားတွေရဲ့ လုပ်ရပ်တွေကို ထိုင်ကြည့်ရင်း အားပါးတရ ရယ်နေချင်စိတ်ကတော့ သည်နေ့အထိ ရှိနေဆဲပေါ့လေ...

ဘ၀သမိုင်းကို ပြန်တွေးကြည့်ရင် လောကငရဲအကြီးစားမဟုတ်ခဲ့ရင်တောင် အရံငရဲလောက်တော့ ဆိုးရွားပြင်းထန်ခဲ့တာတော့ ကိုယ့်ဝမ်းနာမို့ ကိုယ်သာသိပါရဲ့...ငရဲကလာသူ ပြာပူမကြောက်လို့ ဆိုပေမင့် ငရဲကိုပြန်သွားရမှာတော့ မကြောက်တဲ့လူ ရှိမယ်မထင်ဘူးပေါ့လေ...အနှာကြောင့် ကိုယ့်ဘ၀ငရဲခန်းကို ပြန်မသွားရအောင်တော့ သည်နေ့အထိ ခပ်ရှင်းရှင်းပြောရရင် ဘ၀နောက်ဆုံးအချိန်အထိ ကျားကုတ်ကျားခဲ ရုန်းကန်ကြရဦးမှာတော့ သေချာပါရဲ့လို့ နောက်ကိုတစ်ချက် လည်ပြန်ကြည့်ရင်း ရှေ့ဆက်လျှောက်ရဦးမဲ့ ဘ၀တစ်သက်စာအတွက် လှမ်းမျှော်လိုက်မိပါရဲ့ဗျာ....။ ။

( ဟန်ကြည် )
၂၄.၂.၂၀၁၄ ( တနင်္လာနေ့ )

“ ငရဲတမန် MPT . . . ”

သန်ဘက်ခါ မတ်လ ၂၇ ရက်။

 ဦးဟန်ကြည်၏ နွေရာသီခရီးရှည်သည် ထိုနေ့မှ အစပြုပေလိမ့်မည်။ ခရီးစဉ်အတွက် လိုအပ်သောပြင်ဆင်မှုများကို တစ်ဆင့်ချင်း ပြင်ဆင်နေခဲ့သည်မှာလည်း ပြည့်စုံသလောက်ရှိပြီ။ နောက်ဆုံးပြင်ဆင်မှုအဖြစ် ရွှေပြည်ကြီးတွင် သုံးရန်အတွက် MPT ဖုန်းကဒ်တစ်ကဒ် ၀ယ်ရန်သာ ကျန်တော့၏။ သို့သော် ဦးဟန်ကြည် မ၀ယ်ချင်။ ထုတ်ဈေး ၁၅၀၀ ကျပ် အပြင်ပေါက်ဈေး တစ်သိန်းကျော် မတန်တဆကြီးကို အားမပေးလို။

ရွှေပြည်ကြီးကား မိုဘိုင်းကိစ္စနှင့်ပတ်သက်လျှင် အစဉ်အလာရှိပြီးသား။ ဆင့်ပါးစပ် နှမ်းပက်သော လုပ်ရပ်မျိုးသည် ရွှေပြည်သား တာဝန်ရှိသူတို့အတွက် ခေါက်ရိုးကျိုးနေပြီးသား ဖော်မြူလာ။ ၂၀၀၀ ခုနှစ်ဝန်းကျင်ကတည်းက ပေါက်ဈေး ၅ သိန်းသာသာ GSM များကို အပြင်ပေါက်ဈေး သိန်း ၃၀ ၀န်းကျင်ဖြင့် ၀ယ်ဖူးခဲ့ကြပြီ။ မိုဘိုင်းဖုန်းကို ခါးချိတ်ထားခြင်းသည် ကုဋေကြွယ် သူဌေးစတိုင်ဟု ယူဆခဲ့ကြရပြီးပြီ။ ရှိစေတော့။ ထိုခေတ်ထိုအခါတုန်းက ဦးဟန်ကြည်လည်း မိုဘိုင်းဖုန်း မကိုင်နိုင်။

မေတ္တာတော်အနန္တဖြင့် GSM တစ်ကဒ်ကို မြန်မာကျပ်ငွေ ဆယ်သိန်းဖြင့် ရက်ရက်ရောရော ရောင်းပေးခဲ့စဉ်ကလည်း ဦးဟန်ကြည် စိတ်မ၀င်စား။ ငွေယားကလည်း မရှိ။ လွန်ခဲ့သော လေးနှစ်ကျော်က CDMA 450 တစ်ကဒ်လျှင် မြန်မာငွေ ငါးသိန်း ဖြစ်လာသောအခါတွင်မူ မဒမ်ကြည် ရောဂါထလေသည်။ ဦးဟန်ကြည်လည်း စိတ်ကူးပေါက်လာသည်ကို ၀န်ခံရပေမည်။ နွေရာသီ အပန်းဖြေခရီးထွက်နေစဉ်ကာလအတွင်း လုပ်ငန်းအခြေစိုက်ရာ ဒေသနှင့် အဆက်အသွယ်မပြတ်ရေးအတွက် တစ်ကဒ်ဝယ်ခဲ့ရသည်။

MPT စေတနာကောင်းသလို ဆက်သွယ်ရေးတာဝန်ခံကလည်း အတောင်းအရမ်း ရက်ရောလှ၏။ ထုတ်ဈေး ငါးသိန်းဖြစ်သော်လည်း ပေါက်ဈေး ၅ သိန်းခွဲဟု ဈေးဖွင့်၏။ မတတ်နိုင်။ သင်းလက်ခုပ်ထဲကရေကိုး။ သွန်လိုသွန် မှောက်လို မှောက်ပေရော့။ နံပါတ်ကလေးလှလှလိုချင်ရင် ရတယ်ဆရာဟု လောကွတ်ချော်သော သကောင့်သားကို ယုံစား၍ ခုနစ်လေးလုံးပူးနေသော နံပါတ်ကို လက်ညှိုးထိုးပြလိုက်မိလျှင် နံပါတ်ရွေးခ မြန်မာငွေ နှစ်သောင်း ပလုံပြန်၏။ သာဓု သာဓု။ မောင်မင်းကြီးသား MPT အ၀ီစိ မြန်မြန်ရောက်ပါစေ။

ဖုန်းတစ်လုံးဝယ်ထားသော်လည်း ထိုဖုန်းကို ဦးဟန်ကြည် မပိုင်။ မဒမ်ကြည်သာ ပိုင်လေသည်။ ရှိစေ။ ဦးဟန်ကြည်တွင်လည်း ဖုန်းခေါ်စရာ မိတ်ဆွေသင်္ဂဟ များများစားစား မရှိ။ မဒမ်ကြည်ခရီးသွားလျှင် ဖုန်းယူသွားတတ်လေရာ ထိုအခါမျိုးတွင်မူ ဦးဟန်ကြည်လည်း ဖုန်းတစ်လုံး လိုချင်လှသည်။ ဖုန်းဆိုင်များကလည်း တစ်မိနစ်လျှင် မြန်မာငွေ ၁၀၀ ကျပ်နှုန်းဖြင့် အပီအပြင် နွှာသည် မဟုတ်လား။ သို့သော် ဖုန်းတစ်ကဒ်လျှင် မြန်မာငွေ နှစ်သိန်းသည် မတန်တဆ။ ဦးဟန်ကြည် မ၀ယ်ဖြစ်။

MPT ခေတ်နှောင်းပိုင်းတွင် ဖုန်းတစ်ကဒ်လျှင် မြန်မာငွေ ၁၅၀၀ ကျပ်ဖြင့် လက်သင့်ရာ မဲနှိုက်ပေးသည့်စနစ်အရ ဝေပုံကျပေးသော်လည်း ဦးဟန်ကြည် မရလိုက်။ ၀မ်းမနည်း။ ပုဆိန်ရိုးဦးဟန်ကြည်နှင့် MPT သည် တစောင်းစေးနှင့် မျက်ချေး။ ယခုနှစ် ခရီးထွက်ရန်အတွက်ကား MPT ကို မချစ်သော်လည်း အောင့်ခါနမ်းရပေတော့မည်။ ချစ်စွာသော မဒမ်ကြည်က အင်တာနက်မရှိလျှင် မနေနိုင်ပါဟု စောဒက တက်လေသည်ကိုး။ လက်စွဲတော် CDMA 450 က အင်တာနက် သုံး၍မရ။ ကော်တစ်ရာဦးဟန်ကြည်တစ်ယောက် GSM တစ်လုံးဝယ်ရန် စိုင်းပြင်းရတော့သည်။ မိတ်ဆွေတစ်ယောက်က အင်တာနက်သုံးရန်အတွက် CDMA 800 က ပိုကောင်းသည်ဟု အကြံပေး၏။ CDMA 800 ၀ယ်လျှင် သင်းအတွက် ဖုန်းတစ်လုံးပါ ထပ်ဝယ်ရမည်ကို စိတ်မ၀င်စားသော ဦးဟန်ကြည်ကား အင်းမလှုပ် အဲမလှုပ်ဖြစ်။

သည်နေ့ညနေခင်းတွင် ဖုန်းကဒ်ဝယ်ရန်အတွက် အပြင်ထွက်၍ စနည်းနာသော ဦးဟန်ကြည်ကိုမြင်လျှင် တပည့်ကျော်တစ်ယောက်က ကျွန်တော့်ဖုန်းကဒ်ကို ယူသွားပါဆရာဟု ရက်ရက်ရောရော ဥပစာယပြုလေသည်။ ကောင်းလေစွ။ ကော်တရာပါရမီဖြည့်ပေးသော တပည့်ကျော် ဂုဏ်ထူးပေါင်း သောင်းခြောက်ထောင်လောက်နှင့် ဆယ်တန်းအောင်ပါစေဟု ကျကျနနဆုပေးပြီး ဖုန်းကဒ်ကို ယူလာခဲ့လေသည်။ မြန်မာငွေ ငါးထောင်တန် ငွေဖြည့်ကဒ်တစ်ကဒ်ဖြည့်အပြီးတွင် ဟိုဟိုသည်သည် ဆက်ကြည့်သည်။ မရ။ မျက်စိရှေ့ရှိ စားပွဲပေါ်တွင် တင်ထားသော ဖုန်းကို လှမ်းခေါ်ကြည့်သည်။ ဆက်သွယ်မှုဧရိယာ ပြင်ပရောက်နေသည်ဟု သတင်းပို့၏။

ဆယ်ခါခန့် ကြိုးစားကြည့်မှ ဖုန်းတစ်ခါဝင်လေသည်။ ၀မ်းသာအားရဖြင့် ဟဲလိုတစ်ခွန်းပြောအပြီးတွင် ဖုန်းလိုင်းကျသွားပြန်၏။ လိုင်းတုံးလည်း တစ်တုံးမှ မကျန်။ ဒေါသကုမ္မာရ ဦးဟန်ကြည် အသက်ရှူသံ မြန်လာလေပြီ။ ချစ်စွာသော အညာသူ ညီမထံသို ဖုန်းခေါ်ကြည့်သည်။ မရ။ လေးငါးခြောက်ခါ ခေါ်အပြီးတွင် လက်စွဲတော် NOKIA C-6 ပါ hang သွားလေတော့သည်။ လေးနှစ်တိတိ နှာမစေး ချောင်းမဆိုးခဲ့သော C-6 ဂန့်သည်ကို မြင်ရလျှင် ဦးဟန်ကြည် ပေါက်ကွဲလာလေပြီ။ ဖုန်းကို restart ချပြီး ပြန်ကြိုးစားသည်။ လိုင်းမရှိ။ ခေါ်ကြည့်သည်။ network error ပြပြန်သည်။ ဆယ့်ငါးခါခေါ်အပြီးတွင် တစ်ကောဝင်လေ၏။ အထိတ်ထိတ်အလန့်လန့်ဖြင့် ဟဲလိုတစ်ခွန်းပြောကြည့်သည်။ ဖုန်းမကျသေး။ ၀မ်းသာအားရဖြင့် ညီမလေးရေ...အစ်ကိုပါဟ...ဟု ပြောအပြီးတွင် ဖုန်း hang သွားပြန်သည်။ ဦးဟန်ကြည် ဆဲမိလေပြီ။ ဖွတ်ကြား MPT။ ကလေလ၀ MPT။ လူလိမ်လူညာ MPT။

မဒမ်ကြည်၏ ဖုန်းတွင် MPT ကဒ်ထည့်ပြီး ခေါ်ကြည့်သည်။ အောက်အီးလည်းမမြည်။ အွတ်အွတ်သံလည်း မကြားရ။ အယုတ်တမာ MPT။ ဦးဟန်ကြည်၏ သည်းခံနိုင်စွမ်း ကုန်လေပြီ။ ဖုန်းကဒ်ကိုထုတ်ပြီး လွှင့်ပစ်ရန် စိတ်ကူးသည်။ တပည့်ကျော်၏ မျက်နှာကို ကွက်ခနဲမြင်မိသောကြောင့် ပစ်လုဆဲဆဲလက်ကို အမြန်ဘရိတ်အုပ်ရ၏။ ကိုယ်ပိုင်ကဒ်ဖြစ်လျှင် အိမ်သာထဲပစ်ချပြီး ရေဆွဲချလိုက်မည်မှာ သေချာသလောက်နီးနီး။

ဖုန်းကဒ်လက်ဝယ်ရောက်ပြီးကတည်းက ဒေါသထွက်လိုက်ရသည်မှာ အကြိမ်ပေါင်းမနည်း။ ဆဲလိုက်ဆိုလိုက် ကြိမ်းမောင်းလိုက်မိသည်မှာလည်း အကြိမ် နှစ်ဆယ်မက။ တော်သေးပြီ။ သကောင့်သား MPT နှင့် ရေရှည်ပေါင်းမိလျှင် လူလည်း အောက်တန်းစားဖြစ်ပေတော့မည်။ ပါးစပ်ကြမ်းတမ်းသည့် လူသရမ်း ဘ၀ ပြောင်းပေရော့မည်။ အနှီ MPT သည် ရွှေပြည်သူ ရွှေပြည်သားများကို ဒေါသအိုး ပေါက်ကွဲစေရန် ဆဲနည်းပေါင်းစုံ ဆဲတတ်စေရန် အတတ်ဆိုးများ သင်ပေးနေသည့် ငရဲတမန်ပင် ဖြစ်တန်ရာ၏။ လူယဉ်ကျေးဖြစ်စေရန်အတွက် လျှာတစ်ချောင်းကို အနိုင်နိုင်ထိန်းနေရသော ဦးဟန်ကြည်တစ်ယောက် MPT ကို ဝေါင်ဝေါင်ရှေးဖို့ ဆုံးဖြတ်လိုက်လေပြီ။ ခရီးစဉ်က ပြန်ရောက်၍ ဖုန်းကဒ်ကို ပိုင်ရှင်တပည့်ကျော်လက်ထဲ ပြန်ထည့်ပေးပြီးလျှင် ပုဆိန်ရိုးပီပီ DTEC ကဒ်ဖြင့် oversea ခေါ်တော့မည်။ ငွေကုန်လျှင် ကုန်ပါစေတော့။ ငရဲတော့ဖြင့် မလိုချင်တော့ပြီ။ ကျေးဇူး MPT...ထွီ...း( ။ ။

( ဟန်ကြည် )
၂၅.၃.၂၀၁၄ ( အင်္ဂါနေ့ )