Wednesday, 29 September 2010

မကျန်းမာခြင်း . . .

ဒီရက်ပတ်တွေမှာ ကျန်းမာရေးပြန်ကောင်းလာတာကြောင့် နေရထိုင်ရတာ လန်းလန်းဆန်းဆန်း ရှိလာတယ်။ ကြားနေကျအသံတွေတောင် နားဝင်ပီယံရှိနေသလိုလို။ မြင်နေကျမျက်နှာတွေတောင် ပိုချစ်စရာကောင်းနေသလိုလို။ စားနေကျထမင်းတောင် ပိုအရသာရှိနေသလိုလို ခံစားရပါတယ်။

ကျန်းမာရေးရဲ့ အရေးပါပုံကို ကိုယ့်လူနာတွေကို မကြာမကြာပြောပြဖြစ်ပေမယ့် ဘယ်လောက်အရေးပါတယ်ဆိုတာကိုတော့ ကိုယ်တိုင်မကျန်းမာမှဘဲ သိရပါတော့တယ်။
ကျန်းမာရေးနဲ့ လွတ်လပ်ရေးဆိုတာ လေလိုပါပဲ။ ရနေတုန်းက တန်ဖိုးထားရကောင်းမှန်းမသိဘဲ ဆုံးရှုံးသွားမှဘဲ တန်ဖိုးရှိမှန်းပိုသိရတာပါ။ လေကိုနေ့စဉ်ရှူနေရပေမယ့် ဘယ်လောက်အရေးပါတယ်ဆိုတာ လူတိုင်းမသိကြပါ။ နှာစေးတဲ့အခါ၊ နှာခေါင်းပိတ်နေတဲ့အခါ၊ အဆုပ်ကျန်းမာရေးမကောင်းလို့ အသက်ကောင်းကောင်းမရှူနိုင်တဲ့ အခါမျိုးရောက်မှ လေဟာဘယ်လောက်ထိ အရေးကြီးမှန်းသိလာရပါတယ်။ ကျန်းမာရေးလည်း ဒီလိုပါပဲ၊ ကျန်းမာနေလို့ သွားနိုင်လာနိုင်နေတုန်းကတော့ ကျန်းမာရေးရဲ့အရသာကို ကိုယ်ကောင်းကောင်းမသိခဲ့ရိုးအမှန်ပါ။ မကျန်းမမာလည်းဖြစ်လာရော အရင်ကျန်းမာချိန်က ဘ၀ရဲ့အရသာတွေကို လွမ်းလိုက်တာ မပြောပါနဲ့တော့။

မကျန်းမာနေတဲ့အချိန်မှာ
ဘာလုပ်လုပ်၊ ဘာစားစား အရသာမရှိတဲ့အပြင် ဘ၀ကြီးမှာရှင်သန်နေရတာ၊ အလုပ်လုပ်နေရတာပါ အနှစ်သာရမဲ့နေသလိုပါ။ တစ်ခါတစ်လေမှာ အလုပ်လုပ်နေရင်းနဲ့ ဘယ်လောက်လုပ်လုပ် တစ်နေ့သေမှာပဲလေဆိုတဲ့ အတွေးဆိုးကြီးဝင်လာရင် အလုပ်ကိုစွမ်းတမန်လုပ်ချင်စိတ်တောင် ကုန်သလို၊ ခမ်းသလို ဖြစ်သွားပါလေရော။ ပညာရှင်တစ်ယောက်အနေနဲ့ ဘယ်လိုအနေအထားမျိုးမှာပဲဖြစ်ဖြစ် တိုင်းပြည်နဲ့လူမျိုးအပေါ် တာဝန်ကျေရမယ်ဆိုတဲ့ အတွေးကို မ၀င်ဝင်အောင်ရိုက်ထည့်ပြီး ပြန်ပြန်မောင်းနှင်ရတာလဲ အခါခါပါ။

မကျန်းမာတဲ့ အတောအတွင်းမှာ
စာတွေရေးနေဖြစ်တယ်။ အချိန်ရရင် ရသလိုကိုယ့်ပညာတွေ၊ ဗဟုသုတတွေကို ဖြန့်ဝေပေးဖို့ ကြိုးစားဖြစ်ပါတယ်။ ကိုယ်သေသွားခဲ့ရင် ကိုယ်လေ့လာထားသမျှ ကိုယ့်နောက်ကို အလဟဿအပါမခံနိုင်ပါ။ အများအတွက်မဟုတ်နိုင်ရင်တောင် အနည်းစုအတွက်လောက်ကတော့ အကျိုးရှိအောင်လုပ်သွားချင်ပါတယ်။ အဲဒီအတွေးဝင်လာတာ၊ ကိုယ့်တာဝန်ကို ပိုသိလာတာတွေကတော့ မကျန်းမာခြင်းရဲ့ အမြတ်တွေပဲ ဖြစ်မယ်ထင်ပါရဲ့။

နှလုံးအခြေအနေကို ECG ဆွဲကြည့်ဖို့ စိတ်ကူးရှိပေမယ့် လောလောဆယ်တော့ မအားသေးပါ။ ဒါ့အပြင် ရင်ဘတ်လည်း အရင်လိုမအောင့်တော့သလို နှလုံးခုန်တာလဲ ပုံမှန်ပြန်ဖြစ်သွားတာကြောင့် ကောင်းသွားပြီလို့ ခပ်ဖော့ဖော့လေးတွေးထားပါတယ်။ အရာရာကို အကောင်းမြင်စိတ်၊ ချစ်တဲ့စိတ်နဲ့ကြည့်နိုင်အောင် ကြိုးစားနေတာလည်း တော်တော်လေးတော့ ခရီးပေါက်နေပါပြီ။

မကျန်းမာရာကနေ ရလာတဲ့ စိတ်ဓာတ်ခွန်အားတွေ၊ အတွေးအမြင်တွေကို ခိုင်မာအောင်တည်ဆောက်ပြီး စာတွေဆက်ရေးပါ့မယ်။ ဖတ်တဲ့သူနည်းနေသေးတဲ့ ဘလော့လေးသာသာဖြစ်ပေမယ့် ဖတ်သူတစ်ယောက်စီအတွက် အကျိုးရှိနိုင်သမျှရှိအောင် ကြိုးစားပေးမယ်လို့ ဆုံးဖြတ်ချက်ချထားပါတယ်။

အားလုံး ကျန်းမာရွှင်လန်းနိုင်ကြပါစေ...

No comments:

ကြိုက်ရင်ပေါ့လေ . . .