စလေဦးပုညရဲ့ ပီပြင်ပြောင်မြောက်လွန်းတဲ့ အရေးအသားကို ဖော်ဆောင်နိုင်တဲ့ တေးထပ်အချို့ကို ထပ်ပြီးတင်ပြလိုက်ပါတယ်။ လွယ်ကူ ရှင်းလင်းပြီး ထိရောက်တဲ့ အရေးအသားကို လေ့လာကြည့်ကြပါစို့။
အသားတော် အရောင်ထွက်တာက
မှောင်နက်လို့မဲညို ။
ထောင်ထွက်နဲ့မကွဲလိုတယ်
သရဲဆိုဇာတိ ။
ခံတွင်းကထုတ်ဖော်လျှင်
အာပုတ်စော် ထိုးလှပါဘိ ။
သူ့ပါးစပ်အပြီးပေတယ်
သွားချီး(ကြေး)တွေအပြည့် ။
အနီးလေလွန်မကြည့်ချင်ဘု
ရွံစလိကြောက်ဖွယ် ။
ဘုတ်တစ္ဆေရုပ်ရည်ကျအောင်
ဗြုတ်တွေကပေါလိုက်လှတယ် ။
ကိုယ်နံ့က ခွေးသူငယ်လို
မွှေးပေတယ် မသတီပျို့အောင်လို့
ညှီစို့စို့ လင်းတစော်
နည်းတူရဲ့နော် ။
ဂျီး(ကြေး)ထူချက် ရှစ်ထပ်ကျော်အောင်
ညစ်ပတ်တော်မူလွန်းလှလေး ။
ဒီတေးထပ်ကို ထမင်းစားနေရင်းများဖတ်မိရင် ထမင်းတောင်ဆက်စားချင်စိတ်ရှိတော့မယ် မထင်ပါ။ စက်ဆုတ်ရွံရှာစရာ ကောင်းလောက် အောင် ရေးသားထားတာမို့ ရသမြောက်လွန်းတဲ့ တေးထပ်ဖြစ်ပါတယ်။
သူပြောင်ရင် ခေါင်ကွန့်လို့
ကြောင်ဝံ့တဲ့သူပါ ။
ရှောင်မတွံ့ကျောက်သော်မာရင်
နောက်တော်ပါသံချောင်း
ပြော့မယ်ပ ညီလွယ်ရင်
ရွှေဆီဝယ်ချက်တဲ့ဖယောင်း ။
အိုးတော်ကပဲ့ပိန်ရင်
ရွဲ့လိမ်လ်ိမ်စလောင်း ။
သူချိုရင် ကြံချောင်းပ
ဉာဏ်ံစောင်း၍ခါးမူ
တမာပင်ထိပ်ဖျားက
ကြက်ဟင်းခါးသီးနိုင်တဲ့လူ ။
သူမဲကမှောင်ကူမယ်
သူဖြူရင်ဖြူချင်းပ ။
ကြင်ချင်းကြင်မယ်ဆို
ကိုးဆလောက်ပို ။
ဆိုးကြစို့တကယ်ဆိုရင်
ဓားပြဗိုလ်လုပ်နိုင်ငဲ့လေး ။ ။
တေးထပ်ဆိုပေမယ့် သူတပါးကို ကန်ကျောက်ရေးဖွဲ့ရတဲ့ ရကန်သဘောမျိုးပါ ပါနေတဲ့ တေးထပ်တစ်ပုဒ်ပါ။ ရကန်ဆန်သောတေးထပ် လို့ ပြောနိုင်ပါတယ်။ ဒါပေမယ့် ရကန်လို သူတပါးကို အတင်းနင်းနှိပ်ပြီး ရေးထားတဲ့ သဘောမျိုးတော့ မတွေ့ရပါ။ အတွေးရော၊အရေးပါ သွက်တဲ့ တေးထပ်တစ်ပုဒ်ဖြစ်ပါတယ်။ဒီတေးထပ်တွေကတော့ စကားပြေပြန်စရာမလိုအောင် ရှင်းရှင်းလင်းလင်းရှိတာမို့ ပြန်မပေးတော့ ပါ။ မြန်မာမှု၊ မြန်မာစာပေကို မြတ်နိုးသူများ ကျေနပ်နိုင်ကြပါစေ။ ။
No comments:
Post a Comment