စလေဦးပုညနဲ့ အချုပ်တန်းဆရာဖေ

တကယ်တော့ ကုန်းဘောင်ခေတ်ရဲ့ အထင်ကရစာဆိုတော်ကြီး၊ နှောင်းခေတ်ပညာရှင်တွေက မြန်မာပြည်ရဲ့ရှိတ်စပီးယားလို့ အမည်တပ် ခံရတဲ့ စလေဦးပုညဟာ ရုပ်ဆင်းအင်္ဂါ ပြည့်စုံသူမဟုတ်ပါ။ ခြေတစ်ဖက်သိမ်ပြီး၊ လက်တစ်ဖက်ကလည်း သေးနေရှာတဲ့ မွေးရာပါ ဒုက္ခိတ ပါ။ ဒါပေမယ့် ပညာဉာဏ်ပါရမီ ရင့်သန်လှသူမို့လည်း သူ့ရဲ့အားနည်းချက်တွေ ပျောက်ကွယ်နေခြင်းဖြစ်ပါတယ်။ ဘယ်သူမှလည်း သူ့အားနည်းချက်ကို ဖော်ထုတ်စော်ကားရဲမယ် မထင်ပါ။ သူနဲ့တစ်ခေတ်တည်း ပေါ်ခဲ့တဲ့ ခေတ်ပြိုင်စာဆို အချုပ်တန်းဆရာဖေက လွဲရင်ပေါ့။

အချုပ်တန်းဆရာဖေဆိုတာကလည်း သူ့ခေတ်နဲ့သူတော့ ခေသူမဟုတ်ပါ။ ဦးပုညလို အနုအလှတွေ၊ ထိမိတဲ့စာသားမျိုးတွေ မသုံးနိုင်ပေ မယ့် နယ်ချဲ့အင်္ဂလိပ်ကို ကလောင်သွားနဲ့ မကြောက်မရွံ့ ကလိရဲတဲ့ အာဇာနည်စာဆိုတစ်ဦးပါ။ ဦးပုညနဲ့ ဆရာဖေတို့ဟာ ခတ်ဖော် ခတ်ဖက်တွေမို့ တစ်ယောက်အကြောင်းပြောရင် တစ်ယောက်ကို ချန်ထားလို့မရပါ။ တစ်ယောက်နဲ့တစ်ယောက်လည်း မညှာတမ်း တိုက်ခိုက်ရေးသားကြသူတွေ ဖြစ်ပါတယ်။ သူမတူအောင် အသားမည်းလှတဲ့ ဆရာဖေကို ရည်ရွယ်ပြီး-

ခါးတောင်းကျိုက် ပိတုန်းပိတ်နဲ့

ကျုံးထိပ်ကငဖေ

ကုန်းပြိတ္တတစ္ဆေလို

အသရေဟိတ်နွမ်း ။

မနှိုင်းအပ် မယှဉ်ရာ

နင်ဘာပြုဟော့ရမ်း …

ဆိုတဲ့တေးထပ်ကိုရေးလို့ ဆရာဖေကို နံမည်ခေါ်ပြီး ပြောင်ပြောင်ကြီး တွယ်ခဲ့ပါတယ်။ ဒါကိုမကျေနပ်တဲ့ ဆရာဖေကလည်း -

ကဗျာစီမောင်ပုည

ဆောင်ဂုဏ်ပြထုတ်လျှင်

တောင်ခြုံက ပုတ်သင်လို

ကုတ်ခွင်သ်ိမ်လက်သေး ॥

ဆိုတဲ့ တေးထပ်နဲ့ ဦးပုညရဲ့အားနည်းချက်တွေကို ဖော်ပြီးပြန်တွယ်ပါတယ်။ သူတို့နှစ်ယောက် အပြန်အလှန်တိုက်ခိုက်ကြတဲ့ ကဗျာတွေ၊ တေးထပ်တွေ တော်တော်များပါတယ်။ စာဆိုတော်တွေ ရန်ဖြစ်တာက စာတွေ၊ ပေတွေနဲ့ဆိုတော့ စာပေလောကအတွက်တော့ ကဗျာ ကောင်း၊ စာကောင်းတွေ တော်တော်များများအဖတ်တင်ကျန်ရစ်ပါတယ်။ တကယ်ကောင်းတဲ့ ရန်ဖြစ်နည်းပါပဲ။

တကယ်တော့ ဒီဇာတ်လမ်းကို စသူက ဆရာဖေဖြစ်ပါတယ်။ အဲဒီခေတ်က ဦးပုညနံမည် ဟုန်းဟုန်းတောက်ချိန်မို့ ကဗျာကောင်း၊ စာကောင်းတစ်ပုဒ်များတွေ့ရင် ဦးပုညရေးတာပဲလို့ တစ်ထစ်ချတွက်ကြပါတယ်။ ဒါကို ဆရာဖေကလည်း တော်တော်မျက်စိ စပါးမွေးစူး တယ်ထင်ပါတယ်။ အဲဒီအခြေအနေမှာ ပန်းတိမ်းမင်းသားကလည်း အားပေးအားမြှောက်ပြုတာကြောင့် ဦးပုညကိုခတ်တဲ့ ဒီတေးထပ်ကို ဆရာဖေရေးခဲ့ပါတယ်။

စာကောင်းရင်မအေပေးတွေက

စလေရေးဆိုကြပြန်တယ်

တို့များကျဉာဏ်မမီတယ်

ကံမပီညစ်နွမ်း…

စတဲ့စာသားတွေပါတဲ့ အဲဒီတေးထပ်ကြောင့်ပဲ စာပေတိုက်ပွဲ စခဲ့ကြပါတော့တယ်။ အဲဒီခေတ်ကတော့ ပွဲကြီးပွဲကောင်း နေမှာပါပဲ။ ဘာပဲဖြစ်ဖြစ် သူတို့စာပေတိုက်ပွဲကတော့ မြန်မာစာပေလောကကို အကျိုးပြုခဲ့တယ် ဆိုတာတော့ သေချာနေပါတယ်။ ။